وزیر اعظم کاآسٹریاکے وفاقی چانسلرسے رابطہ،افغانستان کی صورتحال پرگفتگو

اسلام آباد: وزیراعظم عمران خان نے آسٹریا کے وفاقی چانسلر کارل نیہمر سے ٹیلی فونک رابطہ کیا اور دوطرفہ تعلقات، علاقائی امن و استحکام اور افغانستان کی صورتحال سمیت دیگر اہم امور پر گفتگو کی ہے۔ 

تفصیلات کے مطابق وزیر اعظم عمران خان نے پاک آسٹریا تعلقات کی اقتصادی جہتوں کی اہمیت پر زور دیتے ہوئے پاکستان کے ساتھ آسٹریا کی سرمایہ کاری اور تجارتی تعاون کو سراہا اور مختلف شعبہ جات میں دو طرفہ تعلقات پر تبادلۂ خیال کیا۔ 

یہ بھی پڑھیں:

وزیر اعظم منڈی بہاؤ الدین میں جلسے سے خطاب آج کریں گے

آسٹرین فیڈرل چانسلر سے بات چیت کے دوران وزیراعظم عمران خان نے اعلیٰ تعلیم، قابل تجدید توانائی، انفارمیشن ٹیکنالوجی اور سیاحت سمیت مختلف شعبوں میں دوطرفہ تعلقات کو مزید وسعت دینے کی ضرورت پر زور دیا۔ 

ٹیلیفونک گفتگو کے دوران وزیر اعظم نے کہا کہ خیبر پختونخوا کے شہر ہری پور میں انسٹیٹیوٹ آف اپلائیڈ سائنسز اینڈ ٹیکنالوجی پاک آسٹریا دو طرفہ شراکت داری کا مثالی مظہر اور اعلیٰ تعلیم کے شعبے میں بہتر تعاون کی خواہش کا اظہار ہے۔ 

دونوں سربراہانِ مملکت نے افغانستان کی صورتحال پر بھی تبادلہ خیال کیا۔ وزیراعظم کا کہنا تھا کہ عالمی برادری کو انسانی بحران سے نمٹنے اور افغانستان میں معاشی تباہی کو روکنے کے لیے فوری اقدامات کرنے چاہئیں۔

اس موقعے پر آسٹریا کے وفاقی چانسلر نے افغانستان کی صورتحال سے مؤثر انداز میں نمٹنے اور آسٹرین اور دیگر افراد کے افغانستان سے انخلاء پر وزیراعظم کا شکریہ ادا کرتے ہوئے دو طرفہ اقتصادی تعاون کو مزید گہرا کرنے پر اتفاق کیا۔

وزیراعظم عمران خان نے وفاقی چانسلر کو دورہ پاکستان کی دعوت دی۔ دریں اثناء وزیراعظم نے سعودی عرب میں پاکستان کے نامزد سفیر امیر خرم راٹھور سے ملاقات اور دونوں ممالک کے درمیان برادرانہ تعلقات کو مزید مضبوط بنانے کی ہدایت کی۔