وزیراعظم عمران خان کی مسجد اقصیٰ پر اسرائیلی فوج کی فائرنگ کی شدید مذمت

اسلام آباد: وزیراعظم عمران خان نے رمضان المبارک میں مسجد اقصیٰ پر اسرائیلی فورسز کی جانب سے کئے گئے وحشیانہ عمل کی شدید مذمت کی ہے۔

وزیراعظم عمران خان کا اس حوالے سے کہنا تھا کہ رمضان المبارک کے دوران مسجد اقصی پر اسرائیلی فورسز کے حملے کی شدید مذمت کرتے ہیں، اسرائیلی فوج انسانیت اور بین الاقوامی قانون کے تمام اصولوں کی خلاف ورزی کررہی ہے۔

Strongly condemn Israeli Forces' attack esp during Ramazan on Palestinians in Qibla-e-Awaal, Al-Aqsa Mosque, violating all norms of humanity & int law. We reiterate support for Palestinian ppl. Int community must take immed action to protect Palestinians & their legitimate rights

— Imran Khan (@ImranKhanPTI) May 9, 2021

وزیراعظم نے کہا کہ ہم فلسطینی عوام کی مکمل حمایت کا اعادہ کرتے ہیں جب کہ بین الاقوامی برادری کو فلسطینیوں اور ان کے جائز حقوق کے تحفظ کے لئے فوری طور پر عملی کردار ادا کرنا ہوگا۔

واضح رہے کہ صدر مملکت ڈاکٹر عارف علوی اور چیئرمین سینیٹ صادق سنجرانی نے بھی مسجد اقصیٰ پر اسرائیلی فورسز کی جانب سے کئے گئے وحشیانہ عمل کی شدید مذمت کی ہے۔

صدر مملکت عارف علوی کی جانب سے جاری بیان میں کہا گیا کہ فلسطینیوں پر اسرائیلی نسلی امتیاز اور مظالم جاری رہنا گھناؤنی بات ہے۔انہوں نے کہا کہ نمازیوں پر حملوں کے مناظر کو مغربی میڈیا پر معمول کی جھڑپیں قرار دیا گیا۔

صدر پاکستان ڈاکٹر عارف علوی کا کہنا تھا کہ وہ وقت دور نہیں جب بین الاقوامی سیاست ذاتی مفادات پر نہیں، اخلاقیات پر مبنی ہو گی۔

دوسری جانب چیئرمین سینیٹ صادق سنجرانی نے مسجداقصیٰ میں اسرائیلی جارحیت کی مذمت کرتے ہوئے کہا ہے کہ سینیٹ کے اگلے اجلاس میں اس حوالے سے مذمتی قرارداد لائیں گے۔

اپنے بیان میں صادق سنجرانی نے کہا کہ نہتے فلسطینی نمازیوں پر ظالمانہ تشدد نہایت بزدلانہ اقدام ہے۔ انہوں نے کہاکہ ہم اپنے فلسطینی بھائیوں کے ساتھ کھڑے ہیں۔

نام نہاد اسرائیلی ریاست فلسطینیوں کی تحریک آزادی زیادہ دیر دبانہیں سکتی۔چیئرمین سینیٹ نے کہا کہ رمضان المبارک میں ایسی کارروائیاں قبلہ اول کی توہین کے مترادف ہیں، پاکستان فلسطین کے مسئلے پر اپنے موقف پر قائم ہے۔