مذہبی رواداری، پاکستانی سکھ تاجر کے زیر اہتمام رمضان پیکیج تقسیم

پشاور: پاکستان کے صوبہ خیبر پختونخوا میں پاکستانی سکھ تاجر کے زیر اہتمام رمضان پیکیجز تقسیم کیے گئے ہیں جن میں 200کلو کھجور اور چینی کے سیکڑوں پیکٹ شامل تھے۔

تفصیلات کے مطابق سکھ تاجر پرلت سنگھ نے 3 مساجد کی تعمیر کیلئے سیمنٹ کے 100 تھیلے اور گدے بھی عطیہ کیے۔ واضح رہے کہ خیرات سکھ مذہب کا لازمی حصہ ہے اور سکھ برادری دنیا بھر میں غریبوں کو باقاعدگی سے کھانا کھلاتی ہے۔

یہ بھی پڑھیں:

رواں مالی سال کے دوران ٹیکسٹائل برآمدات میں 25فیصد کا اضافہ

تاجروں کی مقامی انجمن کے صدر حاجی شیر محمد آفریدی کا کہنا ہے کہ آج پرلت سنگھ نے نہ صرف کھانے کی چیزیں تقسیم کیں بلکہ مقامی مساجد کیلئے سیمنٹ کا عطیہ بھی دیا۔ سکھ برادری پاکستانی معاشرے کا اٹوٹ حصہ بن چکی ہے۔

جمعہ کے روز خیبر پختونخوا کے علاقے تیرہ وادی میں رمضان پیکیج تقسیم کیا گیا۔ حاجی شیر محمد آفریدی نے مزید کہا کہ علاقے کے لوگ جو دہشت گردی کی لہر سے بری طرح متاثر ہوئے ہیں، انہیں واقعی امداد کی ضرورت ہے۔

سکھ مذہب کی تعلیمات سے پتہ چلتا ہے کہ ہندو مت کے برعکس سکھ ازم کو ماننے والے ایک توحیدی مذہب اور ایک کتاب گیان گرو گرنتھ پر ایمان رکھتے ہیں۔سکھ  پاکستان کے علاوہ بھارت اور کینیڈا سمیت متعدد ممالک میں بستے ہیں۔