گوگل نیوز پر ہمیں فالو کریںپاکستان کرکٹ بورڈ (پی سی بی) نے بنگلہ دیش کے خلاف آئندہ ہوم ٹی ٹوئنٹی سیریز کے لیے 16 رکنی اسکواڈ کا باضابطہ اعلان کر دیا ہے۔
متعدد شیڈول تبدیلیوں اور بنگلہ دیش کرکٹ بورڈ (بی سی بی) سے مشاورت کے بعد یہ دورہ اب 27 مئی سے شروع ہوگا۔
سلیکشن کمیٹی نے 16 رکنی اسکواڈ منتخب کیا ہے جس میں سلمان علی آغا کپتان اور شاداب خان نائب کپتان ہوں گے۔
اسکواڈ کا انتخاب جاری پاکستان سپر لیگ (پی ایس ایل 10) میں کھلاڑیوں کی کارکردگی کی بنیاد پر کیا گیا ہے، جو 25 مئی کو ختم ہو رہی ہے۔ یہ سیریز ہیڈ کوچ مائیک ہیسن کی بطور کوچ پہلی ذمہ داری بھی ہو گی۔
سلمان علی آغا (کپتان)، شاداب خان (نائب کپتان)، محمد حارث (وکٹ کیپر)، حسن علی، محمد وسیم جونیئر، صاحبزادہ فرحان، خوشدل شاہ، حسن نواز، محمد عرفان خان، صائم ایوب، فہیم اشرف، فخر زمان، نسیم شاہ، حارث رؤف، ابرار احمد، حسین طلعت پاکستانی اسکواڈ کا حصہ ہیں۔
یہ تین میچوں پر مشتمل سیریز لاہور کے قذافی اسٹیڈیم میں کھیلی جائے گی، جس کا آغاز 27 مئی کو ہوگا اور اختتام 31 مئی کو ہوگا۔
اس سیریز کا اصل منصوبہ پانچ میچز پر مشتمل تھا، جن میں سے چند میچ فیصل آباد کے اقبال اسٹیڈیم میں کھیلے جانے تھے تاکہ وہاں انٹرنیشنل کرکٹ کی بحالی کی جا سکے۔
لاجسٹک اور سیکورٹی مسائل کی وجہ سے شیڈول میں تبدیلی کی گئی۔ حتمی شیڈول پی سی بی کے چیئرمین محسن نقوی اور بی سی بی حکام کے درمیان ملاقات کے بعد طے پایا۔
