ملک کا بجٹ خسارہ 55 کھرب روپے کی ریکارڈ سطح تک پہنچ گیا

اسلام آباد: پاکستان کا بجٹ خسارہ مالی سال 22-2021ء کے دوران 55 کھرب روپے  کی ریکارڈ سطح تک جا پہنچا ہے۔ وفاقی وزارتِ خزانہ نے اعدادوشمار جاری کردئیے۔

تفصیلات کے مطابق ملک کا بجٹ خسارہ مقررہ ہدف کے مقابلے میں 37 فیصد زائد رہا جو مالی سال 22-2021ء کیلئے 44 کھرب روپے رکھا گیا تھا جو حاصل نہیں کیا جاسکا۔ 

یہ بھی پڑھیں:

ڈالر کی قدر میں کمی، نئی قیمت 216 روپے ہوگئی

وفاقی وزیرِ خزانہ مفتاح اسماعیل بجٹ خسارہ 56 کھرب روپے سے زائد ہونے کا خدشہ پہلے ہی ظاہر کرچکے تھے جس کی وجہ موجودہ حکومت نے پیٹرولیم مصنوعات پر دی گئی سبسڈی قرار دی ہے۔

وفاقی وزیرِخزانہ کا کہنا ہے کہ تیل پر سبسڈی دینے کی وجہ سے آئی ایم ایف کی جانب سے قرض پروگرام تاخیر کا شکار ہوا۔ وفاقی بجٹ خسارہ مجموعی ملکی پیداوار یعنی جی ڈی پی کا 8.2فیصد بنتا ہے۔

حکومت نے گزشتہ مالی سال کے دوران 92 کھرب روپے خرچ کیے جس کا حجم مقررہ ہدف سے 7کھرب 30 ارب زائد رہا۔ جاری اخراجات ہدف سے 11 کھرب روپے زائد رہے۔

جاری اخراجات کا حجم 86 کھرب 70 ارب روپےتکجاپہنچا۔پاکستان نے ملکی قرض کی ادائیگی کے دوران ہدف سے 1 کھرب 20 ارب روپے زائد  32 کھرب روپے کا سود بھی ادا کیا۔