گوگل نیوز پر ہمیں فالو کریںسابق وزیر اعظم اور پاکستان مسلم لیگ (ن) کے تاحیات قائد نواز شریف اپنی رہائش گاہ جاتی امراء سے ائیرپورٹ کے لیے روانہ ہوچکے ہیں جبکہ ان کی ائیر ایمبولینس لندن اڑان بھرنے کے لیے تیار ہے۔
مسلم لیگ (ن) کے تاحیات قائد نواز شریف لندن کے لیے 10بجے روانہ ہوں گے جس کے تمام تر انتظامات مکمل ہوچکے ہیں اور لاہور ائیرپورٹ پر قطر ی ائیر ایمبولینس ان کی منتظر ہے۔
نواز شریف کو ایمبولینس کے ذریعے فلائنگ ہسپتال منتقل کیا جائے گا جبکہ لندن کے لیے براستہ دوحہ روانگی ہوگی جس کے لیے ائیرپورٹ پر سیکیورٹی کے سخت انتظامات کیے گئے ہیں۔
اپنے تاحیات قائد کو الوداع کہنے کے لیے متوالوں کی بڑی تعداد جاتی امراء اور ائیرپورٹ کے قرب و جوار میں موجود ہے جبکہ نواز شریف جاتی امراء سے ائیرپورٹ کے لیے روانہ ہوچکے ہیں۔
دوسری جانب قومی اسمبلی میں قائدِ حزبِ اختلاف میاں شہباز شریف نے کہا کہ کارکنان نے نواز شریف کی صحتیابی کے لیے دل سے دُعائیں کیں، دُعاؤں کے اثر سے نواز شریف صحت یاب ہو کر وطن لوٹیں گے۔
میاں نواز شریف کے ساتھ لندن روانگی سے قبل اپنے پیغام میں قائدِ حزبِ اختلاف نے کہا کہ سابق وزیر اعظم نے دل سے پاکستان کی خدمت کی۔ عوام سے اپیل ہے کہ ان کے لیے دُعا کریں۔
یاد رہے کہ پاکستان مسلم لیگ (ن) کے تاحیات قائد اور سابق وزیر اعظم نواز شریف آج علاج کے لیے لندن روانہ ہوں گے جبکہ قومی اسمبلی میں قائدِ حزبِ اختلاف شہباز شریف بھی ان کے ہمراہ ہوں گے۔
وفاقی حکومت کی طرف سے ابھی تک باضابطہ طور پر نواز شریف کا نام ای سی ایل سے نکالا نہیں گیا، تاہم لاہور ہائی کورٹ کے حکم کے تحت وزارتِ داخلہ نے انہیں بیرونِ ملک جانے کی اجازت دی ہے۔
مزید پڑھیں: نواز شریف کی علاج کے لیے آج لندن روانگی، شہباز شریف بھی ہمراہ ہوں گے
