قومی انڈر 13 ون ڈے کا فائنل خیبرپختونخوا اور جنوبی پنجاب کے مابین اتوار کوہوگا

قومی انڈر 13 ون ڈے ٹورنامنٹ کے تمام، پانچ راؤنڈز مکمل ہونے کے بعد خیبرپختونخوا اور جنوبی پنجاب کی ٹیموں نے پوائنٹس ٹیبل پر پہلی دو پوزیشنز حاصل کرکے ٹورنامنٹ کے فائنل میچ تک رسائی حاصل کرلی ہے جو 6 فروری کو اتوار کے روز کھیلا جائے گا۔

تفصیلات کے مطابق خیبرپختونخوا انڈر13 نے ناقابل شکست رہتے ہوئے 10 پوائنٹس جبکہ جنوبی پنجاب نے 3 میچز جیت کر 6 پوائنٹس حاصل کیے۔ٹورنامنٹ میں 2،2 میچز جیتنے والی وسطی پنجاب اور شمالی علاقہ جات کی ٹیموں کے پوائنٹس4،4 رہے۔ 

یہ بھی پڑھیں:

اعظم خان کے ہاتھوں شاہد آفریدی کی دھلائی، سول میڈیا پر میمز کا طوفان

دوسری جانب سندھ دو اور بلوچستان صفر پوائنٹس کے ساتھ پوائنٹس ٹیبل پر پانچویں اور چھٹے نمبر پر موجود ہیں۔ٹورنامنٹ کے پانچویں راؤنڈ میں خیبرپختونخوا، سندھ اور جنوبی پنجاب نے اپنے اپنے میچز جیت لیے۔کے پی کے اور بلوچستان کے مابین میچ کراچی میں کھیلا گیا۔ 

یوبی ایل اسپورٹس کمپلیکس کراچی میں کھیلے گئے میچ میں خیبرپختونخوا نے 83 رنز کا ہدف 4 وکٹوں کے نقصان پر حاصل کرکے بلوچستان کو شکست دی۔ این بی پی اسپورٹس کمپلیکس کراچی میں کھیلے گئے میچ میں 187 رنز کے تعاقب میں ناردرن کی ٹیم مقررہ تیس اوورز میں 8 وکٹوں کے نقصان پر 124 رنز ہی بناسکی۔

کے سی سی اے اسٹیڈیم کراچی میں کھیلے گئے میچ میں سندھ نے محمد آذان کے ناٹ آؤٹ 88 رنز کی بدولت سینٹرل پنجاب کو ایک وکٹ سے ہرادیا۔ فاتح ٹیم نے 202 رنز کا مطلوبہ ہدف چھ گیندیں قبل 9 وکٹوں کے نقصان پر حاصل کیا۔