آرمی ایکٹ میں ترمیم کے حوالے سے قومی اسمبلی کی دفاعی کمیٹی کا اجلاس کل دوبارہ طلب

اسلام آباد: آرمی ایکٹ میں ترمیم کے حوالے سے قومی اسمبلی کی دفاعی کمیٹی کا اجلاس کل پیر کو دوبارہ طلب کرلیا گیا ۔

میڈیا رپورٹ کے مطابق قومی اسمبلی کی دفاعی کمیٹی کا اجلاس پیر کو دوبارہ طلب کرلیا گیا ہے جس میں دیگر امور کے علاوہ آرمی ایکٹ، ایئر فورس ایکٹ اور نیوی ایکٹ پر غور اور ان کی منظوری بھی دی جائے گی۔

ذرائع کا کہنا تھا کہ سیکریٹری قومی اسمبلی نے قومی اسمبلی کی دفاعی کمیٹی کے 3 جنوری کو ہونے والے اجلاس پر اعتراضات اٹھائے تھے۔

ان کا کہنا تھا کہ چیئرمین کمیٹی امجد نیازی کی غیر موجودگی پر جمیل احمد خان نے 3 جنوری کے اجلاس کی صدارت کی حالانکہ انہیں قواعد کے تحت عبوری چیئرمین نہیں بنایا گیا تھا۔

مزید پڑھیں: فواد چوہدری نے حریم شاہ کی وجہ سے مبشر لقمان کو بھری محفل میں تھپڑ جڑدیا

واضح رہے کہ 3 جنوری کے اجلاس میں سینیٹ کی قائمہ کمیٹی برائے دفاع کے اراکین بھی شریک ہوئے تھے۔

دوسری جانب وفاقی حکومت اپوزیشن کے مطالبے پر آرمی ایکٹ میں ترامیم کے بلز سینیٹ کی قائمہ کمیٹی برائے دفاع کو بھیجنے پر تیار ہوگئی۔یکم جنوری کو وزیراعظم عمران خان کی زیر صدارت کابینہ کے اجلاس میں ترامیم کی منظوری دی گئی تھی۔