پرویز مشرف کو سزا سے سرحد پر کھڑے ہر سپاہی کو دکھ ہوا، چوہدری شجاعت حسین

گجرات: سربراہ مسلم لیگ (ق ) چوہدری شجاعت حسین نے کہا ہے کہ مشرف کو سزا سے سرحد پر کھڑے ہر سپاہی کو دکھ ہوا، ہمیں فوج کے اس سپاہی کے جذبات کی بھی تشویش ہونی چاہیے۔

چوہدری شجاعت حسین نے اپنے بیان میں کہا اس فوجی پر کیا بیتے گی جب اس کے سپہ سالار کو غدار کہا جا رہا ہے، ہمارے فوجی جوانوں نے وطن عزیز کا دفاع کیا، کسی بھی ملک کا آرمی چیف آسانی سے نہیں بنتا۔

ان کاکہناتھا کہ مشرف ہو یا کوئی اور فوجی، جنرل کے عہدے تک پہنچنے کے لیے قابلیت، احساسات اور ملک و قوم سے محبت کے جذبات اس میں کوٹ کوٹ کر بھرتے ہوتے ہیں۔

مزید پڑھیں: مشرف سزائے موت،چیف جسٹس سے نامناسب بات منسوب کی گئی۔فواد چوہدری

چوہدری شجاعت حسین کا کہنا تھا 1947 سے آج تک ہزاروں مثالیں ملتی ہیں کہ ہمارے فوجی جوانوں نے ملک و قوم کی خاطر اپنی جانیں قربان کیں اور وطن عزیز کا دفاع کیا۔

انہوں نےکہا کہ کچھ لوگ اپنی جھوٹی اور جعلی قابلیت کی بنیاد پر عوام کو گمراہ کر رہے ہیں، فوج کے خلاف اپنے ڈرائنگ رومز اور ٹی وی شوز میں بیٹھ کر مباحثوں کے دوران وہ اپنی جھوٹی قابلیت کو اجاگر کرنے کی کوشش کرتے ہیں۔