وزارتوں کی اچھی کارکردگی میں مراد سعید کا پہلا نمبر،وزیراعظم نے تعریفی سند دیدی

اسلام آباد: وزیراعظم عمران خان نے وفاقی وزراء میں تعریفی اسناد تقسیم کردیں، وزیرِ مواصلات و پوسٹل سروسز مراد سعید کو بہترین کارکردگی کا مظاہرہ کرنے والا وزیر قرار دیا گیا، وزیراعظم عمران خان نے تعریفی سند سے نوازا۔

تعریفی اسناد کی تقسیم کی تقریب وزیراعظم آفس میں منعقد ہوئی ،وزیراعظم نے بہترین کارکردگی دکھانے والے اراکین کو تعریفی اسناد سے نوازنے کے ساتھ وزارتوں کے ملازمین کو اضافی الاؤنسز بھی فراہم کرنے کااعلان کیا۔

وفاقی وزیر اسد عمر کی وزارت منصوبہ بندی، تخفیف غربت و سماجی تحفظ کی معاون خصوصی ثانیہ نشتر اور وزیر تعلیم شفقت محمود کی کارکردگی کو بھی سراہا گیا۔وزیر انسانی حقوق شیریں مزاری، وزیر داخلہ شیخ رشید، وزیر صنعت و پیداوار خسرو بختیار، وزیر خارجہ شاہ محمود قریشی کو سرٹیفکیٹ دیے گئے۔

اس موقع پر گفتگو کرتے ہوئے وزیراعظم نے کہا کہ کوئی بھی نظام صرف اس وقت کام کرتا ہے جب بہترین کارکردگی پر انعامات کا نظام موجود ہو، انہوں نے مزید کہا کہ اعلیٰ کارکردگی کا مظاہرہ کرنے والی وزارتوں کو مزید مراعات دی جائیں گی،ہمیں وزارتوں کی کارکردگی کو مزید بہتر کرنا ہے۔

مزید پڑھیں:وزیراعظم عمران خان نے دنیا کو سی پیک میں سرمایہ کاری کی دعوت دیدی

وزیراعظم عمران خان نے کہا کہ ملک کو غربت سے نکالنا حکومت کا سب سے بڑا چیلنج ہے۔ جب تک جزا اور سزا کا نظام رائج نہیں ہوتا تو قومیں ترقی نہیں کرتیں۔ انہوں نے وزیر شہزاد ارباب کو ہدایت کی کہ وہ وفاقی وزراء کی کارکردگی کا سہ ماہی جائزہ لیں اور تمام وزارتوں کو اگلی ایوارڈ تقریب میں مدعو کریں۔

وزیراعظم کا کہنا تھاکہ مراد سعید واقعی بہترین کارکردگی دکھا رہا تھا،وہ سڑکیں جو شریفوں کے دور میں ڈبل پیسے پر بن رہی تھیں اسی معیار کی سڑکیں اس نے آدھے پیسے میں بنائیں،پاکستان پوسٹ کو عرصے بعد منافع بخش ادارے میں تبدیل کیا۔