نوجوان ملک میں تبدیلی کیلئے اہم کردار ادا کرسکتے ہیں۔محمد حسین محنتی

کراچی: جماعتِ اسلامی سندھ کے امیر محمد حسین محنتی نے کہا ہے کہ نوجوان ملک میں حقیقی تبدیلی کیلئے اہم کردار ادا کرسکتے ہیں جبکہ آج ہم جو کچھ بھی ہیں وہ جمعیت کی تربیت کا نتیجہ ہے۔

تفصیلات کے مطابق جمعیت سندھ کی تربیت گاہ سے خطاب کرتے ہوئے امیر جماعتِ اسلامی سندھ محمد حسین محنتی نے کہا کہ جمعیت بہتر مستقبل کی نوید ہے جبکہ آج کا نوجوان ہی ملک میں حقیقی تبدیلی اور انقلاب کی راہ ہموار کرسکتا ہے۔

یہ بھی پڑھیں:

حکومت کے دن تھوڑے رہ گئے ہیں، قوم جلد یوم نجات منائے گی، فضل الرحمان

تربیت گاہ سے خطاب کے دوران امیر جماعتِ اسلامی سندھ نے کہا کہ جمعیت انسان میں جراتِ ایمانی پیدا کرتی اور انسان کو انسان بناتی ہے۔ اس موقعے پر ناظمِ صوبہ مرزا نعمان بیگ، جنرل سیکریٹری سعد حسن قاضی اور مجاہد چنا سمیت دیگر بھی موجود تھے۔

تربیت گاہ میں آمد پر امیر جماعتِ اسلامی سندھ کا زبردست استقبال کیا گیا اور انہیں سندھ کا روایتی تحفہ اجرک بھی پیش کیا گیا۔ صوبائی امیر کا کہنا تھا کہ فعال ترین انسان ہر سطح پر جمعیت کا ناظم ہوتا ہے کیونکہ یہ سب سے بڑی ذمہ داری ہوا کرتی ہے۔

امیر جماعتِ اسلامی سندھ محمد حسین محنتی نے کہا کہ جمعیت کے نوجوانوں کو تعلیم کے ساتھ ساتھ دعوت و تربیت کو بھی اولین ترجیح دینی چاہئے کیونکہ ہمارا اصل کام بھی یہی ہے۔ طلبہ یونین کی بحالی کے بعد جمعیت کامیابی کی بھرپور تیاری کرے۔

انہوں نے کہا کہ جمعیت کے نوجوان کردار سازی پر توجہ دیں، قرآن کا مطالعہ اور نماز کی پابندی کریں جبکہ قرآن انسان کی سب سے بڑی روحانی غذا ہے۔ نوجوان نسل اپنے اندر تحریری و تقریری اور قائدانہ صلاحیتیں بیدار کرے۔