معید یوسف کا دورۂ کابل، افغان حکام سے ملاقاتیں، خطے کی صورتحال پر گفتگو

اسلام آباد: وزیر اعظم کے مشیر برائے امورِ قومی سلامتی ڈاکٹر معید یوسف کی قیادت میں پاکستانی وفد نے کابل کا دورہ کیا ہے، اس دوران افغان وزیر خارجہ امیرمتقی سمیت دیگر افغان حکام سے ملاقاتیں ہوئیں جن کے دوران خطے کی صورتحال سمیت دیگر امور پر گفتگو ہوئی۔ 

تفصیلات کے مطابق مشیرِ قومی سلامتی معید یوسف کے دورۂ کابل کا مقصد پاک افغان تعلقات کو فروغ دینے کے ساتھ ساتھ افغان عوام کی امداد کیلئے راہ ہموار کرنا ہے۔ گزشتہ روز حامد کرزئی انٹرنیشنل ائیرپورٹ پر قائم مقام افغان وزیر تجارت نور الدین عزیزی نے پاکستانی وفد کا استقبال کیا۔

یہ بھی پڑھیں:

ہماری ماں بہنوں پر تشدد ہوا تو بلاول اور بختاور خاموش رہے، فیصل سبزواری

بعد ازاں مشیرِ قومی سلامتی ڈاکٹر معید یوسف نے افغان وزیر خارجہ امیر خان متقی سے ملاقات کی جس کے دوران افغانستان کی معاشی صورتحال، خطے کے امور اور سیکورٹی صورتحال سمیت باہمی دلچسپی کے امور پر تبادلۂ خیال ہوا اور دو طرفہ تعاون کو فروغ دینے پر اتفاق کیا گیا۔

مشیرِ قومی سلامتی نے افغانستان کے نائب وزیر اعظم ملا عبدالسلام حنفی سے بھی ملاقات کی۔ ڈاکٹر معید یوسف کی زیر قیادت اعلیٰ سطحی وفد میں افغانستان کیلئے پاکستان کے نمائندۂ خصوصی محمد صادق سمیت دیگر اعلیٰ حکام بھی شامل تھے۔

افغان حکام سے ملاقاتوں کے دوران فریقین کے باہمی دلچسپی کے امور پر گفتگو کی۔ دو طرفہ تجارتی تعلقات اور علاقائی روابط سے متعلق امور بھی زیرِ غور آئے۔ نائب وزیر اعظم افغانستان عبدالسلام حنفی نے پاکستانی وفد کو یقین دلایا کہ افغان سرزمین پاکستان کے خلاف استعمال نہیں ہوگی۔