گوگل نیوز پر ہمیں فالو کریںسعودی وزارت حج و عمرہ نے حج 2025 کے لیے تمام عازمین کے لیے گردن توڑ بخار کی ویکسین کو لازمی قرار دے دیا ہے۔
یہ اہم قدم لاکھوں حجاج کرام کی صحت کے تحفظ کے لیے اٹھایا گیا ہے اور اس کا اطلاق سعودی شہریوں اور بین الاقوامی عازمین پر یکساں ہوگا۔
وزارت نے واضح کیا ہے کہ ویکسین لگوانا حج میں شرکت کے لیے سختی سے لازم ہوگا تاکہ گردن توڑ بخار جیسی خطرناک بیماری سے مکمل تحفظ یقینی بنایا جا سکے۔ وزارت کے ترجمان نے دوٹوک انداز میں کہا کہ ویکسین نہ لگوائی، تو حج نہیں! جس سے اس فیصلے کی اہمیت واضح ہوتی ہے۔
بیان میں مزید کہا گیا ہے کہ حج کے دوران لاکھوں لوگوں کے قریبی میل جول کے پیش نظر متعدی بیماریوں کے پھیلاؤ کو روکنا نہایت ضروری ہے۔ اس نئے قانون کو مؤثر بنانے کے لیے حج پیکیج کی رجسٹریشن میں ویکسینیشن کا ثبوت پیش کرنا لازمی ہوگا، اور اس میں کوئی رعایت نہیں دی جائے گی۔
یہ فیصلہ حج کے دوران صحت کے خطرات سے بچاؤ کی مسلسل کوششوں کا حصہ ہے، کیونکہ حجاج کرام کی آپس میں قربت کی وجہ سے ان کے بیمار ہونے کے امکانات زیادہ ہوتے ہیں۔ سعودی حکام نے یہ اقدام اس مقدس موقع کو تمام زائرین کے لیے محفوظ تر بنانے کے لیے اٹھایا ہے۔
