مولانا فضل الرحمان کراچی پہنچ گئے،مفتی محمد تقی عثمانی سے ملاقات

کراچی: پی ڈی ایم کے صدر اور جمعیت علمائے اسلام کے مرکزی امیر مولانا فضل الرحمان کراچی پہنچ گئے، کراچی ایئرپورٹ پر جمعیت علمائے اسلام صوبہ سندھ کے سیکریٹری جنرل علامہ راشد محمود سومرو، مولانا محمد غیاث، قاری محمد عثمان، سمیع الحق سواتی، مولانا امین اللہ، مولانا حماداللہ شاہ، مولانا طارق محمود سومرو، بابر قمرعالم ودیگر نے استقبال کیا۔

جے یوآئی کے سندھ کے ڈپٹی سیکریٹری اطلاعات مولانا سمیع الحق سواتی کے مطابق جے یوآئی کے مرکزی امیر مولانا فضل الرحمان نے آج کراچی پہنچتے ہی رات گئے جامعہ دارالعلوم کراچی کورنگی کا تعزیتی دورہ کیا اور وفاق المدارس العربیہ پاکستان کے صدر مولانا مفتی محمد تقی عثمانی سے حال ہی انتقال کرجانے والے شیخ الحدیث اور دارلعلوم کراچی کے نائب رئیس دارالافتاء مفتی محمود اشرف عثمانی کے انتقال پر تعزیت کی۔

مولانا فضل الرحمان نے مرحوم مفتی محمود اشرف عثمانی کی علمی خدمات پر انہیں خراج تحسین پیش کرتے ہوئے ان کی بلندی درجات کی دعا کی۔ دوسری جانب مولانا فضل الرحمان مختصر دورے کے دوران ایم کیوایم پاکستان کے وفد سے بہادرآباد مرکز میں ملاقات کریں گے اور جمعیت علمائے اسلام کے مرکزی رہنما حافظ عبدالقیوم نعمانی کی مزاج پرسی کیلئے بھی جائیں گے۔

کراچی میں جے یوپی کے مرکزی سیکریٹری جنرل شاہ محمد انس نورانی، وفاق المدارس سندھ کے مسؤل مفتی امداد اللہ یوسفزئی، مولانا عبدالکریم عابد، مولانا ابراہیم سکرگاہی سمیت دیگر کی قیادت میں وفود سے گفتگو کرتے ہوئے مولانا فضل الرحمان کا کہنا تھا موجودہ حکمرانوں نے عوام کا جینا دوبھر کردیا ہے عام آدمی کی زندگی اجیرن ہوگئی ہے۔

انہوں نے کہا کہ جب ناجائز حکومت بن رہی تھی تب جہاز بھر بھر کے لائے جا رہے تھے تو ضمیر کی آواز کہاں تھی، مولانا فضل الرحمان نے کارکنان کے نام پیغام میں کہا کہ سندھ کے کارکنان اسلام آباد لانگ مارچ کیلئے تیار رہیں۔

مزید پڑھیں:پہلی بار سپریم کورٹ آیا،یہ حکومت ہی ناجائز ہے،مولانا فضل الرحمن

ہماری تحریک فیصلہ کن مرحلے میں داخل ہوچکی ہے،ہم تحریکی دور سے گزر رہے ہیں، ناجائز طریقے سے مسلط ٹولے کو اقتدار کے ایوانوں سے باہر کرکے دم لیں گے۔ جے یوآئی سندھ کا قافلہ شیڈول کے مطابق اسلام آباد کے لئےنکلے گا۔