گوگل نیوز پر ہمیں فالو کریںلاہور: پاکستان مسلم لیگ (ن) کی سینیئر نائب صدر مریم نواز شریف نے کہا ہے کہ دعاہے کہ ترازو کے پلڑے سب کے لیے برابر ہوں، امید ہے کہ آج سے عدل کے ایوانوں میں انصاف کی واپسی ہوگی، نوازشریف کے بغض میں عوام کو سزا دی گئی۔
ن لیگ کی چیف آرگنائزر مریم نواز نے پارٹی کے مختلف ونگز کے اجلاسوں سے خطاب میں کہا کہ نوازشریف کو اللہ تعالی نے سرخرو کردیا ہے، اب پاکستان کو سرخروکرنا ہے، اللہ تعالی نے ہر بار نوازشریف کو ’پلس‘ کیا، انہیں مائنس کرنے کی ہر کوشش مائنس ہوگئی۔
مریم نواز کا کہنا تھا کہ دعاہے کہ ترازو کے پلڑے سب کے لیے برابر ہوں، نوازشریف کے بغض میں عوام کو سزا دی گئی،امید ہے کہ آج سے عدل کے ایوانوں میں انصاف کی واپسی ہوگی۔
انہوں نے کہا کہ امید ہے کہ نوازشریف اور ان کے مظلوم ساتھیوں کو”پراجیکٹ“ کے کارندوں کی ناانصافیوں سے نجات ملے گی۔پاکستان کو اب ایک نئی شروعات کی ضرورت ہے، ملک کو انتقام، ٹکراؤ اور افراتفری سے نجات دلانا ہوگی۔
رہنما ن لیگ نے کہا کہ نوازشریف دشمنی کی سوچ دراصل پاکستان دشمنی اور عوام دشمنی کی سوچ ہے، صوبہ سندھ سمیت پاکستان کے کونے کونے میں ترقی کا سفر لے کر جائیں گے۔ہماری لڑائی مہنگائی، معاشی بدحالی اور بیڈگورننس سے ہے۔
مزید پڑھیں:لاہور ماسٹر پلان کیس، پرویز الہیٰ کا ایک روزہ جسمانی ریمانڈ منظور
انہوں نے کہا کہ اللہ تعالی نے پاکستان کی ترقی اورعوام کی خوش حالی نوازشریف کے مقدر میں لکھی ہے۔ نوازشریف اور اُن کے ساتھیوں نے بہادری اور ثابت قدمی سے ناانصافیوں کا سامنا کیا، نوازشریف اور اُن کے ساتھی ہی ملک وقوم کو مسائل کی دلدل سے نکال سکتے ہیں۔
