مریم نواز دھیان سے، مجھے اتنا مخاطب نہ کرو کہ تمہارا خاوند ناراض ہوجائے، عمران خان

ملتان: پاکستان تحریک انصاف کے چیئرمین اور سابق وزیراعظم عمران خان نے مسلم لیگ ن کی نائب صدر مریم نواز پر تنقید کرتے ہوئے کہا کہ مریم نواز تھوڑا دھیان سے، مجھے اتنا مخاطب نہیں کرو کہ کہیں تمہارا خاوند ناراض ہوجائے۔

تفصیلات کے مطابق ملتان میں عوامی جلسے سے خطاب کرتے ہوئے عمران خان نے ایک مرتبہ پھر عام انتخابات کا مطالبہ دہراتے ہوئے کہا ہے کہ 25 سے 29 مئی کے دوران اسلام آباد مارچ کا اعلان کریں گے، اتنی ڈرپوک حکومت ہے کہ پیٹرول اورڈیزل کی قیمت بڑھانے سے ڈررہی ہے، پیٹرول اور ڈیزل مہنگا کرنے کے لیے نیشنل ایکشن سیکیورٹی کونسل کی میٹنگ بلانا چاہتے ہیں تاکہ فیصلے کا بوجھ فوج پر آئے۔ 

سابق وزیراعظم عمران خان نے کہا کہ مجھے بلیک میل کرنے کی کوشش کی، کبھی اپنی قوم کو کسی کے سامنے جھکنے نہیں دونگا، ن لیگ والے جواب دیں کہ کبھی گیدڑ قوم کا لیڈر بند سکتا ہے، کبھی گیدڑ کو بھی کوئی لیڈر مانتا ہے۔

اُن کا کہنا تھا کہ اگر میں آصف علی زرداری اور شہباز شریف کی کرپشن معاف کر دیتا تو سابق صدرجنرل پرویز مشرف کی طرح میں بھی کرسی بچانے کی کوشش کرتا، 11 سال باریاں لینے والوں نے جنرل مشرف سے این آر او لے کرپھر دس سال ملک کو لوٹا، اٹک جیل میں نواز شریف کے آنسو سے ٹشو پیپر ختم ہوگئے۔

یہ بھی پڑھیں: الیکشن کمیشن کو دن رات گالیاں دینے والے عمران خان کو آج شرم تو آئی ہوگی، مریم نواز

ملتان جلسے سے خطاب کے دوران سابق وزیراعظم نے کہا کہ گزشتہ روز مجھے کسی نے مریم نواز کے خطاب کا کلپ بھیجا جس میں اس نے بار بار اتنے جذبے اور جنون سے میرا نام لیا، جس پر میں مریم سے کہنا چاہتا ہوں مریم دیکھو تھوڑا دھیان کرو کہیں تمھارا خاوند ہی نہ ناراض ہو جائے جس طرح تم میرا نام لیتی ہو۔

سابق وزیر اعظم عمران خان کا مزید کہنا تھا کہ جب تک خوف کے بت کو نہیں توڑیں گے، قوم کو عظیم نہیں بناسکتے، مرنےکا، ذلت کا، رزق میں کمی یا نوکری جانے کا خوف بڑے انسان کو چھوٹا بنا دیتا ہے، موت سے ڈرنے والے کسی فوجی نے بڑے تمغے نہیں لیے، تیس سال سے ملک کو لوٹنے والوں نے سازش کی۔

انہوں نے ملتان کے لوگوں کو مخاطب کرتے ہوئے کہا کہ بتاؤ جنوبی پنجاب سے اتنے لوٹے کیسے نکلے؟ امریکی ایمبیسی کے لوگ لوٹوں سے ملنا شروع ہوگئے، وہاں سے سازش ہوگئی، اسلام آباد مارچ سے پہلے آج میرا آخری جلسہ ہے، ان سب کا وقت ختم ہوگیا ہے، اسلام آباد میں عوام کا سمندر آنے والا ہے۔

عمران خان کا کہنا تھا کہ ملک کو مقروض کرنے والے ملک کے مسئلے حل نہیں کرسکتے، لندن میں بیٹھا ہوا ملک کے فیصلے کررہا ہے، کبھی آئی ایم ایف کے پاس جارہے ہیں، کبھی لندن بھاگتے ہیں، وہ خود کو تجربہ کار کہتے تھے، اب پتا لگا ان کو سارا تجربہ کرپشن کا ہے۔