ناروے میں مسلح شخص کا تیر کمان سے حملہ، 5افراد ہلاک

کونگسبرگ: ناروے میں مسلح شخص نے تیر کمان سے حملہ کیا جس کے نتیجے میں 5 افراد ہلاک جبکہ 2 زخمی ہوگئے ہیں۔

تفصیلات کے مطابق ناروے کے جنوب مشرقی قصبے کونگسبرگ میں بدھ کو مسلح شخص نے تیر کمان سے حملہ کیا۔ واقعے کی اطلاع ملتے ہی پولیس نے ملزم کے خلاف کارروائی شروع کردی۔

یہ بھی پڑھیں:

ناروے نے دنیا کا پہلا خودکار الیکٹرک بحری جہاز تیار کرلیا

ناروے میں کورونا ویکسین لگوانے والے 23افراد چند دن بعد ہلاک

قرآن کی بے حرمتی دوبارہ ہوئی تو ہم روکیں گے۔ناروے پولیس چیف

ناروے پولیس کا کہنا ہے کہ ملزم نے کونگسبرگ کے متعدد مقامات پر عوام پر تیر برسائے جسے حراست میں لے لیا گیا۔ زخمیوں کو طبی امداد کیلئے ہسپتال منتقل کردیا گیا ہے۔

پولیس کا کہنا ہے کہ تیر کمان کے علاوہ مسلح شخص کے پاس مزید کون سا اسلحہ تھا، اس پر تفتیش جاری ہے۔ ابتدائی تحقیقات کے مطابق حملے کے دوران ملزم نے اکیلے ہی 5افراد کو ہلاک کردیا۔

زخمی ہونے والے افراد میں ایک آف ڈیوٹی پولیس افسر بھی شامل ہے۔ واقعے کی تصاویر سوشل میڈیا پر وائرل ہو گئیں جن میں تیر کو ایک عمارت میں پھنسا ہوا دیکھا جاسکتا ہے۔

تیر کمان سے کیے گئے حملے کو ناروے کی تاریخ میں 2011 کے بعد سے بد ترین جرم قرار دیا جارہا ہے جبکہ 10 سال قبل انتہا پسند شخص نے زیادہ تر نوجوان لڑکوں سمیت 77افراد کو قتل کیا تھا۔

ایک نیوز کانفرنس کے دوران وزیر اعظم ارنا سولبرگ نے میڈیا کو بتایا کہ کونگسبرگ سے آنے والی خبریں خوفناک ہیں۔ ہم سمجھتے ہیں کہ بہت سے لوگ ڈرے ہوئے ہیں  تاہم حالات قابو میں آچکے ہیں۔