لاہور ہائیکورٹ، عمران خان کیخلاف زمان پارک آپریشن روکنے کے حکم میں توسیع

لاہور ہائیکورٹ نے چیئرمین پی ٹی آئی عمران خان کے خلاف زمان پارک میں جاری آپریشن روکنے کے حکم میں 17 مارچ تک توسیع کردی ہے۔

تفصیلات کے مطابق لاہور ہائیکورٹ میں جسٹس طارق سلیم شیخ نے فواد چوہدری کی جانب سے آپریشن روکنے کی درخواست کی سماعت کی۔ فواد چوہدری کے وکیل نے عدالت کو اسلام آباد ہائیکورٹ کے فیصلے سے آگاہ کیا۔

یہ بھی پڑھیں:

عمران خان سرینڈر کریں، گرفتاری روکنے کا فیصلہ

فواد چوہدری کے وکیل سے مکالمہ کرتے ہوئے عدالت نے استفسار کیا کہ درخواست گزار عدالت میں کیوں نہیں؟ وکیل نے بتایا کہ اسلام آباد کی مقامی عدالت نے فیصلہ کیا ہے۔ عدالت نے ریمارکس دئیے کہ سیکشن 76کے تحت یہ کوئی معاملہ نہیں۔ کوئی قانون نہیں پڑھتا۔

عدالت کا ریمارکس دیتے ہوئے کہنا تھا کہ فریقین نے پورا سسٹم جام کر رکھا ہے۔ کبھی اِس عدالت میں آجاتے ہیں تو کبھی اسلام آباد ہائیکورٹ پہنچ جاتے ہیں۔ وکیل نے کہا کہ یہ سیاسی معاملہ ہے۔ عدالت کا کہنا تھا کہ آپ نے ساری قوم کو مصیبت میں ڈال دیا۔

وکیل نے کہا کہ سکیورٹی کا معاملہ سنجیدہ ہے۔ عمران خان پر قاتلانہ حملے کے سنگین خدشات تھے۔ اس لیے ایف 8 کچہری میں پیش نہیں ہوئے۔ آئی جی پنجاب کا کہنا تھا کہ ہم کسی کا بھی نقصان نہیں چاہتے۔ عدالت کا کہنا تھا کہ اس معاملے پر انکوائری ہونی چاہئے۔

ایڈووکیٹ جنرل پنجاب نے کہا کہ اسلام آباد ہائیکورٹ کا فیصلہ آگیا ہے۔ عدالت نے ریمارکس دئیے کہ ہم نے وارنٹ کے معاملے کو نہیں چھوا۔ دونوں ہائیکورٹس نے وارنٹس پر عملدرآمد سے منع نہیں کیا۔ بعد ازاں مقدمے کی سماعت کل تک ملتوی کردی گئی۔