گوگل نیوز پر ہمیں فالو کریںلاہور: قذافی اسٹیڈیم لاہور میں کھیلے گئے پاکستان سپر لیگ 2025 کے 24ویں میچ میں کراچی کنگز نے ڈک ورتھ لوئس (ڈی ایل ایس) طریقہ کار کے تحت لاہور قلندرز کو چار وکٹوں سے شکست دے دی۔
اتوار کی شب کھیلے گئے اس میچ میں کراچی کنگز نے ٹاس جیت کر پہلے گیندبازی کا فیصلہ کیا جو ان کے حق میں کامیاب ثابت ہوا۔
لاہور قلندرز کی ٹیم مقررہ بیس اوورز میں آٹھ وکٹوں کے نقصان پر 160 رنز بنا سکی۔ کراچی کنگز نے ہدف کا تعاقب جارحانہ انداز میں کیا اور صرف 14اعشاریہ 3 اوورز میں 168 رنز بنا کر فتح اپنے نام کر لی۔
میچ کا مجموعی رن ریٹ 11اعشاریہ 59 رہا جو دونوں ٹیموں کے درمیان ایک برق رفتار مقابلے کی گواہی دیتا ہے۔
کراچی کنگز کی جانب سے نوجوان بیٹر عرفان خان نیازی نے شاندار کارکردگی کا مظاہرہ کیا اور صرف 21 گیندوں پر 48 رنز کی ناقابلِ شکست اننگز کھیل کر “پلیئر آف دی میچ” کا اعزاز اپنے نام کیا۔
ان کی اننگز میں دو چوکے اور پانچ چھکے شامل تھے۔ کپتان ڈیوڈ وارنر نے بھی جارحانہ آغاز فراہم کیا اور 13 گیندوں پر 24 رنز بنائے۔
وکٹ کیپر بیٹر ٹِم سیفرٹ نے 10 گیندوں پر 24 رنز کی دھواں دھار اننگز کھیلی۔ دیگر نمایاں بلے بازوں میں سعد بیگ 25، محمد نبی 15اور خوشدل شاہ 9 رنز کے ساتھ شامل رہے۔
لاہور قلندرز کی بولنگ لائن اپ میں حارث رؤف نے دو وکٹیں حاصل کیں جبکہ ڈیرل مچل نے بھی دو کھلاڑیوں کو پویلین کی راہ دکھائی۔
ریشاد حسین اور آصف آفریدی نے ایک ایک وکٹ حاصل کی تاہم قلندرز کے فاسٹ باؤلر شاہین آفریدی اس میچ میں کوئی وکٹ نہ لے سکے اور تین اوورز میں 41 رنز دے بیٹھے۔
قبل ازیں لاہور قلندرز کی اننگز میں بلے بازوں کی کارکردگی مجموعی طور پر غیر متاثرکن رہی۔ محمد نعیم، عبداللہ شفیق، اور ڈیرل مچل جیسے کھلاڑی کوئی بڑا اسکور نہ بنا سکے۔
کراچی کنگز کے گیند بازوں نے شاندار لائن و لینتھ کے ساتھ باؤلنگ کی اور مسلسل وکٹیں حاصل کر کے قلندرز کی پیش قدمی کو روکے رکھا۔
اس کامیابی کے ساتھ کراچی کنگز نے پوائنٹس ٹیبل پر اپنی پوزیشن مستحکم کر لی ہے جبکہ لاہور قلندرز کو ایک اور مایوس کن شکست کا سامنا کرنا پڑا۔ دونوں ٹیموں کے درمیان روایتی حریفانہ ماحول اور قذافی اسٹیڈیم کی بھرپور تماشائی موجودگی نے اس مقابلے کو یادگار بنا دیا۔
