اسلام آباد: وفاقی وزیر برائے سائنس و ٹیکنالوجی فواد چوہدری نے کہا ہے کہ تنازعۂ کشمیر صرف کشمیر کا نہیں بلکہ پاکستان کے وجود کا مسئلہ ہے۔ اگر آج پاکستان نے اپنے وجود کا احساس نہ دلایا تو ہم صفحہ ہستی سے مٹ بھی سکتے ہیں۔
سماجی رابطے کی ویب سائٹ ٹوئٹر پر اپنے پیغام میں فواد چوہدری نے کہا کہ آج کشمیر جل رہا ہے۔ امریکی بیانات اور عرب ممالک کے اقدامات کو بھول جائیے۔ یہ سوچیئے کہ آج پاکستان اور پاکستانی کیا کر رہے ہیں۔
پاکستانیوں اپنے وجود کا احساس نہ دلایا تو ویسے ہی مٹ جاؤ گے، مسئلہ کشمیر کا نہیں مملکت پاکستان کے وجود کا ہے، آج کشمیر جل رہا ہے امریکہ کیا کہتا ہے، عرب کیا کرتے ہیں یہ چھوڑو تم کیا کرتے ہو اہم ہے ۔۔۔ مٹ جائیگی مخلوق تو انصاف کرو گے۔۔۔۔ منصف ہو تو حشر اٹھا کیون نہیں دیتے
— Ch Fawad Hussain (@fawadchaudhry) August 8, 2019
انہوں نے کہا کہ مقبوضہ کشمیر میں بد ترین مارشل لاء نافذ ہے۔ ہر آٹھ کشمیریوں پر ایک بھارتی فوجی مسلط ہے اور تحریر و تقریر کی کوئی آزادی نہیں۔
فواد چوہدری کا کہنا تھا کہ کشمیر میں انٹرنیٹ سروس معطل ہے اور کشمیری حریت قیادت کو نظر بند کردیا گیا ہے۔ ایسے حالات میں مسئلہ کشمیر پر مذاکرات کی بات سمجھ سے بالاتر ہے۔
مزید پڑھیئے: سابق وزیر خزانہ مفتاح اسماعیل کا گیارہ روزہ جسمانی ریمانڈ منظور