گوگل نیوز پر ہمیں فالو کریںمقبوضہ فلسطین: اسرائیلی فورسز درجنوں ٹینک لے کر لاکھوں فلسطینیوں کو بے دخل کرنے کیلئے غزہ میں داخل ہوگئی ہیں، حماس کے یرغمال اسرائیلیوں کی بازیابی کی کوششیں بھی کی جائیں گی۔
تفصیلات کے مطابق اسرائیلی فورسز نے فلسطینیوں کو علاقہ خالی کرنے کیلئے 24 گھنٹوں کا الٹی میٹم دیا، جس کے چند ہی گھنٹوں بعد صیہونی فوج نے کارروائی شروع کردی۔ مختلف علاقوں میں چھاپے مارے جائیں گے اور علاقہ خالی کروایا جائے گا۔
یاد رہے کہ اسرائیل کی جانب سے غزہ میں بدترین بمباری کا سلسلہ جاری ہے، اس سے قبل اسرائیل نے 6 روز میں غزہ پر 6 ہزار بم گرادیے جبکہ 4 ہزار ٹن بارود برسانے کا بھی اعتراف کیا گیا۔
گزشتہ روز تک کے اعدادوشمار کے مطابق اسرائیلی بمباری میں مجموعی طور پر شہید ہونیوالوں کی تعداد 1500 سے زائد ہوگئی جبکہ 6 ہزار فلسطینی زخمی ہیں جن میں بچے اور خواتین کی بڑی تعداد شامل ہے۔
اسرائیلی حملوں میں 50 سے زائد طبی عملے کے ارکان بھی شہید ہوئے ہیں جبکہ بین الاقوامی ریڈ کراس کمیٹی (آئی سی آر سی) نے خبردار کیا کہ غزہ کے ہسپتالوں میں بجلی کی کمی کی وجہ سے ان کے مردہ خانوں میں تبدیل ہونے کا خطرہ ہے۔
فلسطینی ہلال احمر نے خبردار کیا کہ اگر غزہ کی پٹی میں ایندھن کے داخلے پر پابندی برقرار رہی تو ایمبولینس خدمات 4 دن کے اندر بند کردی جائیں گی، یہ وارننگ ایک ایسے وقت میں سامنے آئی جب زخمیوں اور مرنے والوں کی تعداد روزانہ کی بنیاد پر بڑھ رہی ہے۔
