گوگل نیوز پر ہمیں فالو کریںپی ایس ایل 10 کے آغاز کے بعد اسلام آباد پولیس نے ٹیموں کی آمدورفت کے پیشِ نظر ٹریفک کے متبادل راستوں کا اعلان کردیا ہے جس کا مقصد ٹریفک کی روانی برقرار رکھنا ہے۔
تفصیلات کے مطابق اسلام آباد میں ٹریفک پولیس کے روٹ پلان کے مطابق ٹریفک مسائل پر قابو پانے کیلئے 300 سے زائد افسران و اہلکار ڈیوٹیز پر موجود ہوں گے۔ٹیموں کی آمدورفت کے باعث 12 اپریل کو دن ساڑھے 12 بجے سے رات ڈیڑھ بجے تک سکیورٹی سخت کردی گئی۔
پی ایس ایل ٹیموں کی آمدورفت کیلئے فیض آباد ایکسپریس ہائی وے، کلب روڈ، مری روڈ، فیصل ایونیو، نائنتھ ایونیو اور سری نگر ہائی وے پر غیر معمولی سیکورٹی انتظامات کیے گئے ہیں۔ ایکسپریس ہائی وے اور سری نگر ہائی وے پر روٹ کے باعث ٹریفک کی روانی میں کچھ دیر کا تعطل آئے گا۔
حکام کا کہنا ہے کہ ٹریفک وقتی طور پر سست روی کا شکار ہوگی، شہری ایکسپریس ہائی وے اور سری نگر ہائی وے سے منسلک سروس روڈ کا استعمال کریں، اس کیلئے بلیو ایریا، سیکٹر F-6 اور F-7 کی جانب سفر کے لیئے ایچ 8 انڈر پاس کا استعمال کرنا ہوگا۔
اسلام آباد کے شہریوں کو ہدایت کی گئی ہے کہ ریڈ زون اور سرینا ہوٹل آنے جانے والی ٹریفک مارگلہ روڈ، جناح ایونیو، ایوب چوک اور نادرا چوک کا استعمال کرے، بری امام جانے والے شہری نادرا چوک کا استعمال کریں۔ سیکٹر آئی اور ایچ کے لئے راولپنڈی پشاور روڈ، آئی جے پی روڈ سے سروس روڈ کا استعمال کریں۔
حکام کا کہنا ہے کہ وفاقی دارالحکومت اسلام آباد میں ٹیموں کی آمد و رفت کے دوران ہیوی ٹریفک کا داخلہ ممنوع ہے، مری روڈ سے سرینہ اور فیض آباد براستہ راول ڈیم بند رہے گی۔چیف ٹریفک آفیسر کیپٹن (ر) سیّد ذیشان حیدر کا کہنا ہے کہ اسلام آباد ٹریفک پولیس مختلف مقامات پر شہریوں کی رہنمائی کرے گی۔
شہریوں کو ہدایت کی گئی ہے کہ کسی بھی سفری دشواری سے بچنے کیلئے گھر سے نکلتے وقت 20 منٹ کا دورانیہ رکھ کر گھر سے نکلیں اور کسی بھی پریشانی کا شکار ہونے یا رہنمائی کیلئے کسی بھی وقت ہیلپ لائن 1915 پر کال کی جاسکتی ہے۔ ٹریفک پولیس سوشل میڈیا پلیٹ فارم پر بھی رہنمائی فراہم کرے گی۔
