گوگل نیوز پر ہمیں فالو کریںنیٹ فلکس کی نئی بھارتی سیریز “دی رائلز” مکمل طور پر ایک افسانوی ڈرامہ ہے اور اس کی بنیاد کسی سچی کہانی پر نہیں رکھی گئی۔
یہ ڈرامہ ایک جدید بھارتی شاہی خاندان کی زندگیوں کو موضوع بناتا ہے، جہاں روایات اور طاقت کے پیچیدہ پہلوؤں کو موجودہ دور کے تناظر میں پیش کیا گیا ہے۔
اگرچہ سیریز میں بھارتی شاہی خاندانوں کی طرزِ زندگی اور رسومات سے متاثر ہونے کے آثار ملتے ہیں لیکن یہ نہ تو کوئی تاریخی دستاویز ہے اور نہ ہی سچ پر مبنی کوئی بیان سامنے آیا ہے۔
یہ ہندی زبان میں تیار کی گئی سیریز ریاست “مور پور” کے ایک شاہی خاندان کے گرد گھومتی ہے جو زمین، خطاب اور عوامی احترام میں تو مالا مال ہے لیکن خاندان کے سربراہ کی حالیہ موت کے بعد ان کے مالی وسائل تقریباً ختم ہو چکے ہیں۔
نتیجتاً ولی عہد اویراج سنگھ جو بادشاہ بننے کے لیے تیار نہیں ، ایک ہوٹلنگ اسٹارٹ اپ کے ساتھ شراکت داری پر مجبور ہو جاتے ہیں تاکہ اپنے شاہی محل کو ایک منفرد رائل بی اینڈ بی تجربے میں بدل سکیں۔
کہانی کا مرکزی نکتہ ایک شہزادے اور ایک عام مگر باصلاحیت خاتون کے درمیان جنم لینے والی محبت ہے، جو اپنے کیریئر میں آگے بڑھنے کی خواہش رکھتی ہے۔
قسمت اور حالات انہیں قریب لے آتے ہیں جس کے نتیجے میں ان کے درمیان کشش، جذباتی کشمکش اور بالآخر ایک محبت بھری کہانی جنم لیتی ہے۔
یہ بات واضح رہے کہ اس سیریز کے تمام کردار، حالات اور مقامات بشمول مور پور کا شاہی خاندان اور صوفیہ شنکر کا اسٹارٹ اپ “ورک پوٹیٹو” محض تخیل کی پیداوار ہیں جنہیں نیہا شرما اور ان کی تحریری ٹیم نے تخلیق کیا ہے۔
اس ٹیم میں وشنو سنہا، انوکمپا ہرش، ایشیتا پریتش نندی اور رنگیتا پریتش نندی شامل ہیں۔
