یوکرین پر روسی حملے کا علم ہوتا تو کبھی ماسکو کا دورہ نہیں کرتا، عمران خان

اسلام آباد: پاکستان تحریک انصاف کے چیئرمین عمران خان نے کہا ہے کہ یوکرین پر روسی حملے کا اگر علم ہوجاتا تو کبھی بھی ماسکو کا دورہ نہیں کرتا۔

تفصیلات کے مطابق چیئرمین تحریک انصاف عمران خان نے جرمن نشریاتی ادارے ڈی ڈبلیو کو ایک انٹرویو دیا، جس میں انہوں نے کہا کہ روس نے یوکرین پر حملہ اُن کے ماسکو پہنچنے کے بعد کیا اور انہیں اس حملے کا اندازہ نہیں تھا، مجھے معلوم ہوتا تو میں یقینی طور پر یہ دورہ نہیں کرتا، لیکن جیسا کہ ہوا کہ ہم پہلے ہی وہاں موجود تھے اور اگلی صبح حملہ کردیا گیا۔

انٹرویو کے دوران سابق وزیراعظم نے اپنے دورہ ماسکو اور روسی صدر سے ملاقات کا دفاع کرنے کی کوشش کی اور کہا کہ اس دورے کا منصوبہ کافی وقت پہلے بنایا گیا تھا اور اس دورے کا مقصد پاکستان اور روس کے تعلقات کو بہتر کرنا تھا۔

انہوں نے کہا کی کہ پاکستان کے روس کے ساتھ کبھی بھی زیادہ اچھے تعلقات نہیں رہے کیونکہ ہمارے ملک کو سرد جنگ کے دوران مغربی بلاک کا حصہ خیال کیا جاتا تھا۔

یہ بھی پڑھیں:

نیب کے 2 ریفرنسز پر سماعت، وزیر اعظم کا عدالت میں آج پیش نہ ہونے کا فیصلہ

عمران خان کا مزید کہنا تھا کہ جب یوکرین پر روسی حملے کے خدشات سامنے آئے تو دورہ کرنے سے متعلق پاکستان کے تمام اسٹیک ہولڈرز سے مشاورت کی گئی تھی، جب ہم نے سنا کہ کسی فوجی مداخلت کے خدشات ہیں تو ہم نے مشاورت کی، ہم سب بیٹھے اور معاملے پر غور کیا جس کے بعد ہمارا دفتر خارجہ اس نتیجے پر پہنچا کہ اگر ہم اس موقع اور وقت پر دورہ منسوخ کرتے ہیں تو اس فیصلے سے روس کے ساتھ ہمارے تعلقات سرد خانے کی نذر ہوجائیں گے۔

اُن کا کہنا تھا کہ پاکستان اِس وقت دورہ ملتوی کرنے کا فیصلہ نہیں لے سکتا تھا کیونکہ ہمیں روس سے تیل اور گندم درآمد کرنے کی ضرورت تھی۔

دوسری جانب، پنجاب کے 20 حلقوں میں 17 جولائی کو ہونے والے ضمنی انتخابات کے سلسلے میں مختلف سیاسی جماعتوں کی جانب سے چلائی جانے والی انتخابی مہم میں تیزی آرہی ہے، اسی سلسلے میں پاکستان تحریک انصاف (پی ٹی آئی) کے چیئرمین عمران خان نے بھی صوبے میں جلسے، جلوس کرنے کا فیصلہ کیا ہے، اس دوران صرف لاہور شہر میں 4 ریلیوں سمیت سابق وزیراعطم 7 سے 15 جولائی تک درجنوں عوامی اجتماعات سے خطاب کریں گے۔