مریم نواز کے سپریم کورٹ ججز پر حملوں کا مقصد انتخابات سے فرار ہے۔ عمران خان

لاہور: چیئرمین پی ٹی آئی و سابق وزیر اعظم عمران خان نے کہا ہے کہ مریم نواز کے سپریم کورٹ کے ججز پر حملوں کا مقصد انتخابات سے فرار ہے۔

سماجی رابطے کی ویب سائٹ ٹوئٹر پر اپنے پیغام میں چیئرمین پی ٹی آئی عمران خان نے کہا کہ پی ڈی ایم اور کرپشن کے پیسے پر پلنے والی ایک بگڑی ہوئی خاتون مریم نواز کے سپریم کورٹ کے ججز پر حملے شرمناک ہیں۔

یہ بھی پڑھیں:

عمران خان قومی اسمبلی کی 6نشستوں سے ڈی نوٹیفائی

پی ڈی ایم اور کرپشن کے پیسے پر پلنےوالی ایک بگڑی خاتون مریم کے SC کےججز پر شرمناک اور سوچےسمجھےحملوں کا واحد ہدف انتخابات سےفرار ہےاگرچہ یہ آئین کو روند کر ہی حاصل ہو۔سپریم کورٹ آف پاکستان پرحملوں سےیہ گروہ پاکستان میں جنگل کاقانون راسخ کرنےکےساتھ وفاق کوشدید نقصان پہنچا رہاہے

— Imran Khan (@ImranKhanPTI) February 25, 2023

ٹوئٹر پیغام میں سابق وزیر اعظم عمران خان نے کہا کہ مریم نواز کے سپریم کورٹ ججز پر سوچے سمجھے حملوں کا واحد ہدف انتخابات سے راہِ فرار اختیار کرنا ہے، چاہے اس کیلئے آئین کو روندنا ہی کیون نہ پڑ جائے۔

چیئرمین تحریکِ انصاف عمران خان نے کہا کہ یہ گروہ سپریم کورٹ آف پاکستان پر حملوں سے ملک میں جنگل کا قانون راسخ کرنے کے ساتھ ساتھ وفاق کو شدید نقصان پہنچا رہا ہے۔

خیال رہے کہ اس سے قبل الیکشن کمیشن آف پاکستان نے چیئرمین پی ٹی آئی و سابق وزیر اعظم عمران خان کو قومی اسمبلی کی 6 نشستوں سے ڈی نوٹیفائی کردیا۔

گزشتہ روز الیکشن کمیشن آف پاکستان نے چیئرمین تحریکِ انصاف عمران خان کو قومی اسمبلی کی ان 6 نشستوں سے ڈی نوٹیفائی کیا جن پر سابق وزیر اعظم نے گزشتہ برس ضمنی انتخابات کے دوران کامیابی حاصل کی تھی۔