گوگل نیوز پر ہمیں فالو کریںپاکستان تحریک انصاف (پی ٹی آئی) کے چیئرمین عمران خان کی بیٹوں کے ساتھ ٹیلیفونک گفتگو کرادی گئی، بیٹے دوران گفتگو جذباتی ہوگئے۔
عدالت نے سپرنٹنڈنٹ اڈیالہ جیل کو حکم دیا تھا کہ وہ چیئرمین پی ٹی آئی کی اپنے بیٹوں سے فون پر بات کی اجازت دیں، جس کے بعد عمران خان کی اڈیالہ جیل سے برطانیہ میں موجود ان کے بیٹوں کے ساتھ ٹیلیفونک گفتگو کروادی گئی۔
ذرائع کے مطابق آفیشل سیکرٹ ایکٹ عدالت کی ہدایت پر بات کروائی گئی، عمران خان اور ان کے بیٹوں کے درمیان وٹس ایپ ٹیلی فون کال 30 منٹ جاری رہی، ٹیلی فون کال ساڑھے 4 بجے سے 5 بجے تک کی گئی۔
جیل ذرائع کے مطابق سلیمان اور قاسم جیل میں قید اپنے والد سے گفتگو کرتے ہوئے جذباتی ہوگئے، جس پر چیئرمین پی ٹی آئی عمران خان نے اپنے بیٹوں کو تسلی دی۔
یاد رہے کہ چیئرمین پی ٹی آئی نے بیٹوں سے بات کروانے کے لیے عدالت سے رجوع کیا تھا، پی ٹی آئی کے وکیل شیراز احمد رانجھا کے ذریعے درخواست دائر کی گئی تھی۔
سپرنٹنڈنٹ اڈیالہ نے جیل ایس او پیز کے مطابق بات کروانے سے انکار کیا تھا، تاہم عدالتی حکم پر عمران خان کی بیٹوں قاسم اور سلیمان سے بات کروادی گئی۔
