گوگل نیوز پر ہمیں فالو کریںتیل کی عالمی قیمتوں میں حالیہ کمی کی وجہ سے پاکستانیوں کو 16 ستمبر سے پیٹرولیم کی قیمتوں میں نمایاں کمی کا فائدہ ملنے کا امکان ہے۔
ذرائع کے مطابق پیٹرول کی قیمت میں 11 روپے 70 پیسے فی لیٹر کمی کا امکان ہے۔ ہائی اسپیڈ ڈیزل میں 11.91 روپے فی لیٹر تک کی کمی متوقع ہے۔ مٹی کے تیل کی قیمت میں 8 روپے 30 پیسے فی لیٹر اور لائٹ ڈیزل کی قیمت میں پیر سے 9 روپے 50 پیسے فی لیٹر کمی کا امکان ہے۔
آئل اینڈ گیس ریگولیٹری اتھارٹی (اوگرا) نے مارکیٹ کے موجودہ حالات کی بنیاد پر اپنا ابتدائی جائزہ مکمل کر لیا ہے۔
تفصیلی سفارشات حتمی منظوری کے لیے 15 ستمبر کو حکومت کو بھیجی جائیں گی۔ ایندھن کی قیمتوں میں اس ایڈجسٹمنٹ سے ملک بھر میں صارفین کو خاطر خواہ مالی ریلیف ملے گا جو عالمی تیل کی منڈی میں جاری اتار چڑھاؤ کی عکاسی کرتا ہے۔
ذرائع نے عندیہ دیا ہے کہ پیٹرول تقریباً 12 روپے فی لیٹر سستا ہوسکتا ہے جب کہ ڈیزل کی قیمتوں میں بھی اتنی ہی کمی کا امکان ہے۔ مٹی کے تیل میں 8 روپے فی لیٹر تک کمی متوقع ہے۔ قیمتوں میں حتمی ایڈجسٹمنٹ کا اعلان 15 ستمبر کی شام تک کیا جائے گا۔
اس سے قبل اگست میں حکومت نے یوم آزادی کے موقع پر پیٹرول کی قیمتوں میں 8.47 روپے فی لیٹر کمی کا اعلان کیا تھا، جس سے قیمت کو 260 روپے تک لایا گیا تھا۔ اس کے بعد ستمبر کی پہلی ششماہی میں 2.97 روپے فی لیٹر کی مزید کمی کی گئی، ہائی اسپیڈ ڈیزل کی قیمتوں میں 2.31 روپے فی لیٹر کی کمی ہوئی۔
