سمندری طوفان، کراچی میں آج تیز بارش کا امکان، سیلاب کی وارننگ

کراچی: خلیج بنگال میں بننے والے گلاب نامی طوفان کے باعث آج کراچی میں بھی تیز بارش کا امکان ہے،محکمہ موسمیات نے سیلاب کی وارننگ جاری کردی۔

محکمہ موسمیات کے مطابق خلیج بنگال میں بننے والے گلاب نامی طوفان کے باعث سندھ کے ساحلی شہروں میں تیز بارش ہوسکتی ہے،چیف میٹرولوجسٹ کاکہنا ہے کہ گلاب سے پاکستانی ساحلی علاقوں کو کوئی خطرہ نہیں البتہ بھارتی ریاست گجرات سے ٹکرائے گاتاہم کراچی سمیت سندھ میں 28ستمبر سے 2اکتوبر تک تیز بارش کی پیش گوئی کر دی۔

مزید پڑھیں:کراچی کے مختلف علاقوں میں موسلادھاربارش

محکمہ موسمیات کے مطابق مون سون بارشوں کا یہ اسپیل کم سے کم 4 اور زیادہ سے زیادہ سے 5روز تک جاری رہ سکتا ہے۔ سمندری طوفان کے پاکستان کے ساحلی علاقوں کے قریب سے گزرنے کا امکان ہے جس کے باعث تیز بارش ہوسکتی ہے۔

واضح رہے کہ شہر قائد میں گزشتہ روزصبح سے ہی گرمی عروج پر تھی اور سورج آگ برسا رہا تھا کہ ایک دم موسم میں تبدیلی آئی اور تیز ہوا کے ساتھ بارش کا آغاز ہوا، ڈائریکٹرمحکمہ موسمیات کے مطابق کل تیز ہواؤں اورگرج چمک کیساتھ موسلا دھار بارش ہوسکتی ہے جس سے شہر میں اربن فلڈنگ کا بھی خطرہ رہے گا۔