فلسطین کی مقاومتی تحریک “حماس” کا ایک اعلیٰ سطحی وفد اس تحریک کے بین الاقوامی تعلقات عامہ کے سربراہ “ابو موسیٰ مرزوق” کی قیادت میں ماسکو میں موجود ہے۔ جہاں وہ روس کے نائب وزیر خارجہ “میخائل بوگدانوف” سے ملاقات کر رہے ہیں۔

میخائل بوگدانوف نائب وزیر خارجہ کے علاوہ روسی صدر کے مغربی ایشیا اور افریقہ میں مندوب بھی ہیں۔ دونوں فریقین نے فلسطین کی تازہ ترین صورتحال بالخصوص مغربی کنارے کے خلاف اسرائیل کی انتہاء پسند کابینہ و آباد کاروں کی جارحیت کا جائزہ لیا۔

یہ بھی پڑھیں:

اس کے علاوہ صیہونی رژیم کے ہاتھوں خطے کے امن و استحکام کو لاحق خطرات پر مشاورت کی۔

حماس کے وفد نے اسرائیلی جارحیت کے مقابلے میں مزاحمت کو اپنا قانونی حق قرار دیا۔ وفد نے کہا کہ موجودہ دائیں بازو کی صیہونی حکومت اپنی انتہا پسند پالیسیوں پر عمل پیرا ہوتے ہوئے فلسطینی قوم پر جارحیت اور قتل و غارت گری کی مرتکب ہو رہی ہے۔

دوسری جانب میخائل بوگدانوف نے بھی فلسطینی عوام کے حقوق اور حمایت پر اپنے ملک کے موقف کی جانب زور دیا۔ انہوں نے اس حوالے سے متعلقہ فریقین کے ساتھ روس کی کوششوں کی وضاحت کی۔