گوگل نیوز پر ہمیں فالو کریںگول گپے کا لفظ ہی منہ میں پانی بھر دینے کیلئے کافی ہے اور یہ سوغات سب سے زیادہ مقبول کثیر ثقافتی نمکین کھانوں میں سے ایک ہے۔ اس میں کوئی شک نہیں کہ گول گپا پاکستان کا مصالحے دار پہلو دنیا کے سامنے لاتا ہے اور کیوں نہ ہو؟ چٹپٹے مصالحہ دار پانی سے بھرے ہوئے خستہ گول گپوں نے نہ صرف پاکستانیوں بلکہ دوسرے ممالک کے لوگوں کو بھی متاثر کیا ہے۔
پاکستانیوں کی گول گپے کے ساتھ محبت کبھی ختم ہونے والی نہیں، لیکن یہ واقعی کوئی معمہ نہیں کیونکہ آپ نے تقریباً ہر دیسی طرز کے گول گپے کھائے ہوں گے لیکن ایک موقع بھارتی طرز کے گول گپوں کو بھی دینا چاہئے۔
کراچی کے علاقے ایف بی ایریا میں ٹرپل زیڈ ہندوستانی طرز کے گول گپوں کو حاصل کرنے کے لیے بہترین مقامات میں سے ایک ہے۔ کھانا نہ صرف پیٹ بھرتا ہے بلکہ اس کے دوران حفظانِ صحت کے اصولوں کو مدنظر رکھ کر تندرست بھی رہا جاسکتا ہے۔
چٹخارے دار بھارتی سوغات بڑا پاؤ کراچی کے علاقے کھارادر میں بھی دستیاب
کھارادر کی ممبئی پاؤ بھاجی ذائقے اور لذت کا حسین امتزاج
ٹرپل زیڈ پر ضیاء اسلم اپنے گاہکوں کو خوش آمدید کہتے ہیں جو کہ اس جگہ کے مالک ہیں اور ہر آنے والے شخص کو چٹخارے دار گول کپے کھلانے کا انتہائی ذوق و شوق سے اہتمام کرتے ہیں۔
بھارتی طرز کے گول گپوں کی فلنگ ہلکے ابلے ہوئے آلوؤں سے کی جاتی ہے جس میں کالا نمک، پیاز، چنے، زیرہ، املی کا گودا، پودینے کی چٹنی، مرچ پاؤڈر اور دیگر مصالحہ جات استعمال کیے جاتے ہیں۔
خاص طور پر زیرہ، دھنیا اوراجوائن کی خوشبو گول گپوں کو اشتہا انگیز بنا دیتی ہے۔ ادرک، املی کے پانی کے علاوہ نمک، زیرہ پاؤڈر اور چاٹ مصالحے کا بھی استعمال کیا جاتا ہے جس سے ذائقہ بہترین ہوجاتا ہے۔
ترش پانی اور گول گپوں کے حسین امتزاج سے کھانے والوں کو سرور محسوس ہوتا ہے۔ بھارتی طرز کے گول گپے جیب پر بھاری نہیں پڑتے تاہم ان کا ذائقہ ہمیشہ آپ کے ساتھ رہتا ہے۔
