گوگل نیوز پر ہمیں فالو کریںمظفر آباد: آزاد کشمیر کے علاقے باغ میں گنگا چوٹی میں 7 روز طویل موسم سرما کا میلہ جاری ہے جو عوام الناس اور ایتھلیٹس کو اپنی طرف متوجہ کر رہا ہے۔
یہ تہوار موسم سرما کا جشن سمجھا جاتا ہے اور اس میں ہر عمر کے کھیلوں کے شائعین کے لیے بہت سی سرگرمیاں اور تقریبات شامل کی گئی ہیں جن سے عوام الناس کی بڑی تعداد لطف اٹھا رہی ہے۔
عوام الناس موسم سرما کے کھیلوں سے لطف اندوز ہوئے جن میں سنو بورڈنگ، اسکیئنگ اور آئس سکیٹنگ کے علاوہ مقامی روایتی سردی کے کھیل شامل تھے۔
میلہ دیکھتے ہوئے ایک شخص نے بتایا کہ وہ گنگا چوٹی سے لطف اندوز ہو رہا ہے اور یہ تیسری بار ہے کہ وہ میلے کا دورہ کر رہا ہے جو کہ ایک اچھا تجربہ ہے اور یہاں کا ماحول اسے تازگی بخشتا ہے۔
اس دوران ایک خاتون نے کہا کہ میں کھلاڑیوں کو دیکھ کر لطف اندوز ہو رہی ہوں اور مجھے ان میں سے کسی ایک کھیل میں حصہ لینا چاہیے تھا۔ خاتون نے مزید کہا کہ اس علاقے کی خوبصورتی حیرت انگیز ہے اور برف سے ڈھکی چوٹیاں یہ تاثر دیتی ہیں کہ ہم آزاد جموں و کشمیر میں نہیں بلکہ کہیں یورپ میں ہیں۔
کھیل کے میلے میں ایک اور مہمان نے بتایا کہ اس نے تقریباً تمام شمالی علاقوں کا دورہ کیا ہے لیکن آزاد کشمیر بے حد مختلف ہے اور یہاں منعقد ہونے والا میلہ بین الاقوامی سطح کا میلہ ہے۔
ایک کھلاڑی نے فیسٹیول کو کامیاب بنانے کے لیے انتظامیہ کی جانب سے کیے گئے انتظامات کو سراہتے ہوئے کہا کہ میلے کے لیے بہت سی تنظیموں نے ان کے ساتھ تعاون کیا۔
اسکیئنگ کرنے والے ایک کھلاڑی نے کہا کہ اسکینگ ٹریک اچھا ہے لیکن اسے عالمی کھلاڑیوں کو راغب کرنے کے لیے وقت چاہئے۔ انہوں نے مزید کہا کہ اس علاقے کو اسکیئنگ کے لیے مثالی بنانے کے لیے اقدامات کی ضرورت ہے۔
