سندھ میں بارشوں اور سیلاب سے 518 افراد جاں بحق، 15ہزار سے زائد زخمی

کراچی: سندھ میں سیلاب اور بارشوں کے باعث 518 افراد جاں بحق جبکہ 15 ہزار سے زائد زخمی ہوئے، فوکل پرسن فلڈ ریلیف کا کہنا ہے کہ سیلاب سے متاثر ہونے والے افراد کی تعداد 1 کروڑ کے لگ بھگ ہے۔

تفصیلات کے مطابق سندھ میں 20 اگست سے آج تک سیلاب کے باعث بھاری جانی و مالی نقصان ہوا۔ فوکل پرسن فلڈ ریلیف کا کہنا ہے کہ سیلاب سے متاثرہ اضلاع میں متاثرین کیلئے قائم کیے گئے کیمپس کی تعداد 1975 ہے۔

یہ بھی پڑھیں:

انصاف میں دیر یا ناانصافی؟ 18سال بعد فیصلہ حق میں آنے پر عمر رسیدہ شہری جاں بحق

فوکل پرسن فلڈ ریلیف کی رپورٹ کے مطابق اب تک 5 لاکھ 81 ہزار 10 متاثرین فلڈ ریلیف کیمپس میں منتقل کردئیے گئے۔بارشوں اور سیلاب سے مجموعی طور پر 91 لاکھ 82 ہزار 270 شہری متاثر ہوئے۔

 بارشوں اور سیلاب کے باعث 518 افراد جاں بحق جبکہ 15 ہزار 51 زخمی ہوئے۔ صوبے بھر میں 1 لاکھ 138 مویشی بھی سیلاب کی زد میں آ کر ہلاک ہو گئے۔ 1کروڑ 35لاکھ 51 ہزار 456مکانات کو نقصان بھی پہنچا۔

صوبے بھر میں سیلاب اور بارشوں کے باعث 31 لاکھ 72 ہزار 350 ایکڑ پر کھڑی فصلیں تباہ ہوگئیں۔ سندھ کے 235 تعلقہ اور 1 ہزار 51 یونین کونسلز متاثر ہوئیں۔ سیلاب زدگان کی امداد کیلئے کارروائی جاری ہے۔