شہرِ قائد کے علاقے سرجانی ٹاؤن میں فائرنگ کے نتیجے میں 2 شہری زخمی، 1 جاں بحق جبکہ 2 ڈاکو ہلاک ہوگئے ہیں۔
تفصیلات کے مطابق فائرنگ کا افسوسناک واقعہ سرجانی ٹاؤن کے سیکٹر 7 اے میں پیش آیا جہاں ڈاکو شہریوں سے لوٹ مار کر رہے تھے۔ ڈاکوؤں کی فائرنگ سے 2 شہری زخمی جبکہ 1 جاں بحق ہوگیا۔
سرسید پولیس کی کارروائی، 2ڈکیت رنگے ہاتھوں گرفتار
دریں اثناء شہری کی فائرنگ کے نتیجے میں لوٹ مار کرنے والے دونوں ڈاکو موقعے پر ہلاک ہو گئے۔ پولیس حکام کا کہنا ہے کہ باپ بیٹا گھر کے باہر بیٹھے تھے جن کو ڈاکوؤں نے لوٹنے کی کوشش کی۔
سرجانی پولیس کا کہنا ہے کہ ڈاکوؤں کی فائرنگ کے نتیجے میں والد جاں بحق اور بیٹے کے ساتھ ساتھ ایک راہگیر زخمی ہوگیا۔ اسی دوران شہری نے ڈاکوؤں پر فائرنگ کردی جس سے ڈاکو گر گئے۔
پولیس کا کہنا ہے کہ عوام نے ڈاکوؤں کو دبوچ لیا اور بد ترین تشدد کیا۔ اس دوران پولیس کی نفری جائے واردات پر پہنچ گئی۔ واقعے کی مزید تفتیش جاری ہے۔
خیال رہے کہ اس سے قبل سر سید پولیس نے کارروائی کرتے ہوئے 2 ڈاکوؤں کو کو رنگے ہاتھوں گرفتار کرلیا، ملزمان شہری رضوان کو اسلحے کے زور پر لوٹ رہے تھے کہ گشت پر مامور پولیس موبائل پہنچ گئی۔واقعہ آج سے 2 روز قبل پیش آیا۔