الیکشن کمیشن کا صدر مملکت کو خط، پنجاب میں انتخابات کی منسوخی سے متعلق آگاہ کردیا

لاہور: الیکشن کمیشن نے صدر مملکت عارف علوی کو خط لکھ کر پنجاب کے عام انتخابات کی منسوخی سے متعلق آگاہ کردیا۔

ذرائع کے مطابق پنجاب میں عام انتخاب کی منسوخی کے معاملے پر الیکشن کمیشن کی جانب سے صدر مملکت کو لکھے گئے خط میں پنجاب کے انتخابات کی منسوخی کی وجوہات بتائی گئی ہیں، صدر مملکت کو 8 اکتوبر کی نئی پولنگ تاریخ سے بھی آگاہ کیا گیا۔

ذرائع نے بتایا کہ صدرمملکت عارف علوی کو 8 اکتوبر کی پولنگ کی نئی تاریخ سے آگاہ کرنا مشاورتی عمل کا حصہ ہے۔

یاد رہے کہ 22 مارچ کو الیکشن کمیشن آف پاکستان نے پنجاب میں عام انتخابات کا شیڈول منسوخ کیا تھا، الیکشن کمیشن نے سٹیک ہولڈرز کی بریفنگ اور موجودہ ملکی معاشی و سکیورٹی صورتحال کے پیش نظر حکم نامہ جاری کیا۔

یہ بھی پڑھیں:

خاتون جج کو دھمکانے کا کیس، عمران خان کی وارنٹ معطلی کی درخواست پر فیصلہ محفوظ

حکم نامے میں کہا گیا تھا کہ وفاقی و صوبائی حکومتوں کی جانب سے پیش کیے گئے حالات کے باعث 30 اپریل کو الیکشن کا انعقاد ممکن نہیں ہے اس لیے الیکشن کمیشن 8 مارچ کو جاری کردہ شیڈول سے دستبردار ہوگیا ہے، اب الیکشن آٹھ اکتوبر کو منعقد کرایا جائے گا جس کے لیے مناسب وقت پر نیا شیڈول جاری کیا جائے گا۔

حکم نامے میں الیکشن کمیشن اور عدالتوں کے مختلف فیصلوں کا حوالہ بھی دیا گیا۔

یاد رہے کہ سپریم کورٹ کے حکم پر پنجاب اسمبلی کے انتخابات کیلئے 30 اپریل مقرر کی گئی تھی اور الیکشن شیڈول بھی جاری کردیا گیا تھا۔