پنجاب میں ڈینگی 12 افراد کی جانیں لے گیا، 4 ہزار سے زائد کیسز رپورٹ

لاہور: سردی کی آمد آمد کے ساتھ ہی ڈینگی مچھر کی افزائش میں اضافہ ہوگیا ہے جب کہ روزہ کی بنیاد پر درجنوں کیسز رپورٹ ہو رہے ہیں۔ محکمہ صحت پنجاب کے مطابق اب تک صوبے بھر میں 4 ہزار 876 کیسز رپورٹ ہو چکے ہیں۔

محکمہ صحت پنجاب کی رپورٹ کے مطابق ڈینگی مچھر سے متاثرہ 12 افراد زندگی کی بازی ہار گئے ہیں۔ ڈینگی سرویلنس سیل کی رپورٹ کے مطابق گزشتہ 24 گھنٹوں کے دوران صوبے بھر میں 325 نئے ڈینگی کے کیسز رجسٹرڈ ہوئے ہیں۔

سیکرٹری صحت پنجاب عمران سکندر نے اپنے بیان میں کہا ہے کہ صوبے کے مختلف شہروں میں ڈینگی کے کیسز میں تیزی اضافہ ہورہا ہے۔

عمران سکندر کا کہنا ہے کہ لاہور کے مختلف اسپتالوں میں اس وقت 6 سو 58 مریض زیرعلاج ہیں۔ جبکہ صوبے کے مختلف اسپتالوں میں ڈینگی کے 13 سو 3 مریض زیر علاج ہیں۔

یہ بھی پڑھیں 

سیکریٹری صحت کا کہنا ہے کہ مون سون میں ڈینگی مچھروں کی افزائش بڑھ جاتا ہے جس سے بچاؤ کی احتیاطی تدابیر ازحد ضروری ہیں، مون سون کی بارشوں کے بعد شہری ذمے داری کا مظاہرہ کرتے ہوئے اپنے اپنے علاقے میں پانی کی نکاسی کا بندوبست کریں اور متعلقہ حکام کو آگاہ کریں۔

انہوں نے کہا کہ گزشتہ روز محکمہ صحت کی ٹیموں نے پنجاب بھر میں 4 لاکھ 49 ہزار 187 ان ڈور اور 96 ہزار 383 آؤٹ ڈور مقامات کو چیک کیا۔ گزشتہ روز 2 ہزار 376 مقامات سے لاروا تلف کیا گیا۔