گوگل نیوز پر ہمیں فالو کریںکمالیہ: دو بہنوں سے زیادتی اور ڈکیتی میں ملوث ایک خطرناک ڈاکو پولیس مقابلے کے دوران ہلاک ہو گیا۔
واقعہ تھانہ صدر کمالیہ کی حدود میں پیش آیا۔ پولیس کے مطابق یہ مقابلہ اُس وقت پیش آیا جب پولیس کی ایک ٹیم ڈاکوؤں کے ایک گروہ سے آمنے سامنے ہوئی۔
فائرنگ کے تبادلے میں ڈاکو “وارث علی” اپنے ہی ساتھیوں کی گولی لگنے سے ہلاک ہو گیاجبکہ تین دیگر ملزمان فرار ہونے میں کامیاب ہو گئے۔
پولیس کے مطابق وارث علی اور اس کے تین ساتھیوں نے ایک ڈکیتی کی واردات کے دوران دو بہنوں کو جنسی زیادتی کا نشانہ بنایا تھا۔
ایف آئی آر میں درج تفصیلات کے مطابق چار مسلح ڈاکو متاثرہ خاندان کے کھیتوں میں پہنچے اور انہیں یرغمال بنا کر گھر کا دروازہ کھلوایا۔
گھر میں داخل ہو کر ڈاکوؤں نے اہل خانہ کو باندھ دیا، خواتین کو باہر لے جا کر اجتماعی زیادتی کا نشانہ بنایا اور جاتے ہوئے سات لاکھ روپے مالیت کے زیورات، نقدی اور دیگر قیمتی اشیاء لوٹ کر فرار ہو گئے۔
پولیس نے اس بہیمانہ واقعے پر فوری ایکشن لیتے ہوئے مقدمہ درج کیا جس میں تعزیراتِ پاکستان کی دفعات 376 (اجتماعی زیادتی) اور 392 (ڈکیتی) شامل کی گئیں۔
دوسری جانب فیصل آباد کے تھانہ نشاط آباد کی حدود میں ایک اور واردات کے سلسلے میں چار گرفتار ڈاکو پولیس مقابلے میں مارے گئے۔
پولیس کے مطابق ملزمان زاہد،نوید،اسلام اور قاسم اجتماعی زیادتی اور ڈکیتی کے ایک کیس میں ریمانڈ پر پولیس کی تحویل میں تھے۔
پولیس انہیں بازیابی کے لیے اچکیرا گاؤں لے جا رہی تھی کہ راستے میں ان کے ساتھیوں نے غلام محمد آباد نمبر 2 کے قریب پولیس پارٹی پر حملہ کر دیا۔
پولیس کے مطابق جوابی فائرنگ میں حملہ آوروں نے اپنے ہی چار ساتھیوں کو مار ڈالا اور موقع سے فرار ہو گئے۔ ان ملزمان نے ڈیڑھ ماہ قبل ایک خاتون کو دورانِ ڈکیتی زیادتی کا نشانہ بنایا تھا۔
یہ واقعات اس بات کا ثبوت ہیں کہ پولیس سنگین جرائم میں ملوث عناصر کے خلاف متحرک ہے تاہم قانون نافذ کرنے والے اداروں کو چاہیے کہ وہ مزید مستعدی اور حکمت عملی کے ساتھ عوام کے جان و مال کے تحفظ کو یقینی بنائیں۔
