سابقہ اہلیہ کی شکایت پر عدالت کا محسن عباس کو 16 دسمبر تک جواب جمع کرانے کا حکم

اداکار و گلوکار محسن عباس حیدر کی سابقہ اہلیہ نے عدالت سے رجوع کرتے ہوئے ان کے خلاف شکایت کی جس پر عدالت نے اداکار محسن عباس کو 16 دسمبر تک جواب جمع کرانے کا حکم دیا ہے۔

مدعیہ فاطمہ سہیل نے اپنے بچے کا ماہانہ خرچ لینے کے لیے متعلقہ  فیملی کورٹ سے رجوع کیا اور محسن عباس کی شکایت کرتے ہوئے کہا کہ میں اپنے بچے کا ماہانہ خرچ برداشت نہیں کرسکتی۔

فاطمہ سہیل نے دائر کی گئی درخواست میں مؤقف اختیار کیا کہ میرے سابق شوہر محسن عباس کو حکم دیاجائے کہ وہ بچے کے ماہانہ خرچ کے لیے اعانت کرے۔

عدالت نے مدعیہ فاطمہ سہیل کی درخواست پر کارروائی کرتے ہوئے اداکار محسن عباس کو بچے کا خرچ جمع کروانے کے حوالے سے 9 یوم کے اندر جواب داخل کرانے کا حکم دیا ہے۔ 

یاد رہے کہ اس سے قبل لاہور کی فیملی عدالت نے اداکار و گلوکار محسن عباس حیدر اور ان کی اہلیہ فاطمہ سہیل کے درمیان خلع کا فیصلہ کردیا اور اہلیہ کی خاوند کے ساتھ نہ رہنے کی درخواست منظور کرتے ہوئے خلع کی ڈگری جاری کردی۔

محسن عباس حیدر کے اہلیہ فاطمہ سہیل پر تشدد کیس کی سماعت 26 ستمبر کو لاہور کی فیملی عدالت میں معزز جج بابر ندیم نے کی۔کیس میں خلع کی درخواست پر سماعت کے دوران فریقین  نے دلائل دئیے جبکہ  فیملی عدالت جج بابر ندیم نے طرفین کے دلائل سنے اور اس پر فیصلہ سنایا۔ 

فاطمہ سہیل نے کہا کہ محسن عباس حیدر کے تشدد کے بعد اب اس کے ساتھ صلح کرکے رہنا نہیں چاہتی۔ خدا کی قائم کردہ حدود میں ایک چھت تلے ایک دوسرے کے ساتھ زندگی گزارنا ممکن نہیں رہا۔ 

مزید پڑھیں: محسن عباس حیدر اور اہلیہ  کے درمیان  خلع کا فیصلہ