دعا زہرا کے شوہر ظہیر کی ضمانت میں توسیع کی درخواست منظور

کراچی: عدالت نے شہرِ قائد سے لاپتہ ہونے والی دعا زہرا کے شوہر ظہیر کی ضمانت میں توسیع کی استدعا منظور کر لی ہے۔

تفصیلات کے مطابق دعا زہرا کے شوہر ظہیر احمد کی ضمانت میں توسیع کی درخواست کراچی کی مقامی عدالت نے منظور کی۔ مقدمے کی سماعت ایڈیشنل ڈسٹرکٹ اینڈ سیشن جج شرقی نے کی۔

یہ بھی پڑھیں:

دعا زہرا کو کراچی کے چائلڈ پروٹیکشن بیورو میں منتقل کردیا گیا

عدالت نے مقدمے کے مرکزی ملزم ظہیر اور اس کے بھائی شبیر کی درخواستِ ضمانت کی سماعت کی جس کے دوران دونوں ملزمان پولیس کے سخت حفاظتی انتظامات کے تحت عدالت میں پیش ہوئے۔

سندھ پولیس نے تاحال دعا زہرا کیس کی نئی پیش رفت سے متعلق رپورٹ عدالت میں پیش نہیں کی، نہ ہی ملزمان کے وکلا عدالت میں پیش ہوئے تاہم عدالت نے ملزمان کی درخواستِ ضمانت منظور کر لی۔

ملزمان کی مدتِ ضمانت میں توسیع یکم اگست تک منظور کی گئی۔ عدالت نے ہدایت کی کہ ملزمان کی عبوری ضمانت میں توسیع پر آئندہ سماعت کے دوران دلائل دئیے جائیں۔ عدالت نے ملزمان کو ضمانت میں توسیع دے دی۔

خیال رہے کہ اس سے قبل کراچی کے علاقے ملیر الفلاح سوسائٹی سے لاہور جاکر پسند کی شادی کرنے والی دعا زہرا کو کراچی کے چائلڈ پروٹیکشن بیورو میں منتقل کردیا گیا تھا۔

 دعا زہرا کو عدالتی حکم پر لاہور سے کراچی منتقل کیا گیا  جسے  گزشتہ روز چائلڈ پروٹیکشن بیورو میں رکھا گیا، دعا کو یکم اگست کو متعلقہ ٹرائل کورٹ میں پیش کیا جائے گا۔