پاکستان کا پانی بند کیا تو۔۔۔۔ چین کی جانب سے بھارت کو سنگین نتائج کا انتباہ

چین کے سینئر تجزیہ کار وکٹر گاو نے بھارتی چینل کو دیے گئے انٹرویو میں مودی سرکار کے ممکنہ آبی اقدامات پر شدید ردعمل دے دیا۔

وکٹر گاو نے کہا کہ چین دریا کے بالائی حصے پر ہے اور اگر بھارت نے نیچے والوں (پاکستان) کے لیے پانی روکا، تو چین خاموش نہیں رہے گا، پاکستان کا پانی روکنے کی کسی بھی کوشش کو چین اپنی اتحادی سالمیت پر حملہ سمجھے گا۔

ان کا کہنا تھا کہ بھارت دریا کے درمیانی حصے میں ہے، اسے خود سوچنا چاہیے کہ اگر نیچے والوں کے ساتھ زیادتی کرے گا، تو اوپر والا یعنی (چین) کیا کرے گا؟

سینئر تجزیہ کار وکٹر گاو نے بھارت کو آئینہ دکھاتے ہوئے کہا کہ دوسروں کے ساتھ ویسا سلوک نہ کرو جیسا تم اپنے لیے پسند نہیں کرتے۔

وکٹر گاو نے کہا کہ چین پاکستان کی سالمیت، خودمختاری اور قدرتی حقوق کے مکمل تحفظ کا حامی ہے، گاؤ نے یاد دلایا کہ بھارت اور پاکستان کے درمیان سندھ طاس معاہدہ موجود ہے، اس کی خلاف ورزی عالمی قوانین کی پامالی ہوگی۔

ان کا مزید کہنا تھا کہ چین اور پاکستان کی دوستی آئرن کلاڈ ہے، ہم پاکستان کے مفادات پر کوئی سمجھوتہ نہیں کریں گے۔

دفاعی مبصرین کے مطابق اگر بھارت خطے میں آبی توازن کو بگاڑتا ہے، تو چین برہمپترا کارڈ استعمال کر سکتا ہے۔

تجزیہ کار وکٹر گاو کی وارننگ بھارتی اسٹیبلشمنٹ کے لیے خطرے کی گھنٹی ہے۔

ماہرین کا کہنا ہے کہ چین کی کھلی حمایت پاکستان کی سفارتی فتح اور بھارت کی تنہائی کا ثبوت ہے۔