جنوبی کوریا کے بدھ جوگی سلسلے کے ممتازرہنما وان ہینگ کی شاہ محمود قریشی سے ملاقات

اسلام آباد: جنوبی کوریا کے بدھ جوگی سلسلے کے ممتاز رہنما وان ہینگ نے وفد کے ہمراہ وزارت خارجہ میں وزیر خارجہ مخدوم شاہ محمود قریشی سے ملاقات کی جس میں بین المذاہب ہم آہنگی، سمیت باہمی دلچسپی کے امور پر تبادلہ خیال کیا گیا۔

وزیر خارجہ نے جوگیہ سلسلے کے اعلیٰ سطحی وفد کو وزارت خارجہ آمد پر خوش آمدید کہتے ہوئے بتایا کہ پاکستان مذہبی رواداری، بین المذاہب ہم آہنگی پر یقین رکھتا ہے اور یہی ہمارے مذہب اسلام کی تعلیمات ہیں۔

انہوں نے کہاکہ دنیا بھر میں سکھ مذہب کے پیروکاروں کو ان کے مذہبی پیشوا بابا گرونانک کے گردوارہ تک رسائی دینے کے لیے ہم نے کرتارپور راہداری کو کھول دیا ہے ۔مخدوم شاہ محمود قریشی نے کہاکہ دنیا بھر میں سکھ دھرم کے کروڑوں پیروکار وزیر اعظم عمران خان کے اس اقدام کو سراہ رہے ہیں۔

جنوبی کوریا کے بدھ جوگی سلسلے کے ممتاز رہنما وان ہینگ کی وزارت خارجہ آمد
وزیر خارجہ مخدوم شاہ محمود قریشی سےبدھ جوگی سلسلے کے وفد کی ملاقات
بین المذاہب ہم آہنگی سمیت باہمی دلچسپی کے امور پر تبادلہ خیال
پاکستان مذہبی رواداری، بین المذاہب ہم آہنگی پر یقین رکھتا ہے:وزیر خارجہ pic.twitter.com/Hj2E49lZtu

— PTV News (@PTVNewsOfficial) November 20, 2019

مخدوم شاہ محمود قریشی نے کہاکہ پاکستان میں قدیم گندھارا تہذیب میں بدھ مت کے اہم تہذیبی آثار موجود ہیں ، بدھ مت کے پیروکار کثیر تعداد میں ان مقامات کی زیارت کے لئے پاکستان آتے ہیں جنہیں ہم ہر ممکن سہولیات فراہم کرنے کیلئے پرعزم ہیں۔

وزیر خارجہ نے کہاکہ ہم نے ثقافتی سفارت کاری کا بھی آغاز کر دیا ہے جس کے تحت ہم بدھ ازم سمیت دیگر مذاہب کے پیروکاروں کو پاکستان آنے کیلئے آن لائن ویزہ کی سہولت مہیا کر رہے ہیں۔

بدھ جوگی وان ہینگ نے وزیر خارجہ کو جوگی سلسلے کے خدوخال سے آگاہ کرتے ہوئے بتایا کہ بدھ جوگی سلسلہ ، جنوبی کوریا میں بدھ مذہب کا سب سے بڑا سلسلہ ہے۔وفد کے سربراہ ممتاز جوگی راہنما وان ہینگ نے بین المذاہب ہم آہنگی کے فروغ کیلئے پاکستان کی طرف سے اٹھائے گئے اقدامات پر حکومت پاکستان، وزیر اعظم عمران خان اور وزیر خارجہ مخدوم شاہ محمود قریشی کا شکریہ ادا کیا۔