وزیرِ خارجہ کی عمران خان کے دورۂ روس کی حمایت، ٹی ٹی پی سے مذاکرات کا اعتراف

واشنگٹن: وزیرِ خارجہ بلاول بھٹو زرداری نے سابق وزیر اعظم عمران خان کے دورۂ روس کی حمایت کی اور ٹی ٹی پی سے مذاکرات کا اعتراف کرتے ہوئے کہا ہے کہ مذاکرات کا جائزہ لے رہا ہوں۔

تفصیلات کے مطابق وزیرِ خارجہ بلاول بھٹو زرداری نے اپنے حالیہ بیان میں کہا کہ مسئلۂ کشمیر کا حل جنوبی ایشیا میں قیامِ امن کیلئے ضروری ہے جبکہ بھارت مقبوضہ وادی پر مظالم ڈھا رہا ہے۔

یہ بھی پڑھیں:

جنوبی وزیرستان میں دہشت گردوں کا حملہ، فوجی جوان شہید

بیان میں وزیرِ خارجہ بلاول بھٹو زرداری نے کہا کہ مقبوضہ جموں و کشمیر تنازعے کے منصفانہ حل کی ضرورت ہے۔ ہماری خارجہ پالیسی کا مدعا امداد کی بجائے تجارت ہے۔

اپنی امریکی ہم منصب سے ملاقات کے متعلق وزیرِ خارجہ بلاول بھٹو زرداری نے کہا کہ انٹونی بلنکن کے ساتھ ملاقات میں ہماری توجہ تجارت پر مرکوز رہی۔ روس یوکرین جنگ پر امن کے خواہاں ہیں۔

روس یوکرین جنگ کے متعلق وزیرِ خارجہ نے کہا کہ مسئلے کو بات چیت کے ذریعے حل کرنا چاہئے۔ پاکستان نے محدود وسائل کے باوجود انسانی بنیادوں پر یوکرین اور افغانستان کی امداد کی۔

وزیرِ خارجہ بلاول بھٹو زرداری نے کہا کہ بھارت مقبوضہ کشمیر میں آبادی کے تناسب کو تبدیل کر رہا ہے۔ مقبوضہ وادی میں مسلمانوں کی اکثریت کو اقلیت میں تبدیل کرنے کی کوشش ہورہی ہے۔

بلاول بھٹو زرداری نے کہا کہ مقبوضہ کشمیر میں بھارتی اقدامات اقوامِ متحدہ کے ادارے سلامتی کونسل کی قراردادوں کے منافی ہیں۔ پاکستان امریکا کے ساتھ جامع دو طرفہ تعلقات چاہتا ہے۔

خارجہ پالیسی کے متعلق بلاول بھٹو زرداری نے کہا کہ پاکستان سب کے ساتھ دوستی رکھنا چاہتا ہے، ہم کسی سے دشمنی نہیں چاہتے۔ افغانستان کی نئی حکومت کو عالمی برادری کی توقعات پر پورا اترنا ہوگا۔

انہوں نے کہا کہ افغانستان میں خواتین کو تمام بنیادی حقوق ملنے  چاہئیں۔ ہم خواتین کو تعلیم تک رسائی دینے کے حامی ہیں۔ میں پاکستان کے وزیرِ خارجہ کے طور پر خواتین کے حقوق کا علمبردار ہوں۔

روس تعلقات پر وزیرِ خارجہ نے کہا کہ عمران خان نے خارجہ پالیسی کے تحت روس کا دورہ کیا تھا۔ میں سابق وزیر اعظم کے دورۂ روس کا دفاع کرتا ہوں۔ اس پر پاکستان کو قصوروار ٹھہرانا درست نہیں۔

یوکرین روس جنگ پر بلاول بھٹو زرداری نے  مزید کہا کہ ہم کسی جارح کی طرفداری نہیں کرنا چاہتے۔ جنگ دیکھ دیکھ کر تھک چکے ہیں، کسی تنازعے کا حصہ نہیں بننا چاہتے۔

ٹی ٹی پی سے مذاکرات کا اعتراف کرتے ہوئے وزیرِ خارجہ نے کہا کہ مذاکرات کی کیا صورتحال ہے، تفصیل میں نہیں جاسکتا۔ مذاکرات پر رپورٹ کا جائزہ لے رہا ہوں۔ ماضی میں نتائج اچھے نہیں نکلے۔