آڈیٹر جنرل نے سول ایوی ایشن میں اربوں روپے کے گھپلوں کا سراغ لگالیا

کراچی:سول ایوی ایشن میں اربوں روپے کے گھپلے، آڈٹ رپورٹ نے کھاتے کھول دیئے، ادارے میں سنگین بے ضابطگیوں کا انکشاف، رپورٹ جاری کردی گئی۔

آڈیٹر جنرل پاکستان کی جانب سے سول ایوی ایشن کے حوالے سے مالی سال 2020-2019کے حسابات کی آڈٹ رپورٹ جاری کردی گئی ہے جس میں سول ایوی ایشن کے 53 آڈٹ پیرا شامل ہیں۔

آڈیٹر جنرل پاکستان کی رپورٹ میں سول ایوی ایشن میں اربوں روپے کی مالی بے ضابطگیوں کااحاطہ کرتے ہوئے بتایا گیا ہے کہ سی اے اے کو متعدد یاد دہانیوں کے باوجود ڈپارٹمینٹل آڈٹ کمیٹی کا اجلاس طلب نہیں کیا گیا۔

مزید پڑھیں:
جعلی لائسنس کا معاملہ، سول ایوی ایشن کے 5 افسران اور ایک پائلٹ زیر حراست

مشتبہ لائسنسز کی تصدیق جاری، سول ایوی ایشن نے 15 مزید پائلٹس کو معطل کردیا

رپورٹ میں 65 ارب 11 کروڑ 40 لاکھ روپے کے مالی معاملات کے آڈٹ پیراز بھی شامل ہیں۔ رپورٹ میں کہا گیا ہے کہ مالی بے قاعدگیوں، غیر قانونی فلائٹس کے اجازت ناموں اور ملکیتی اراضی پر قبضے سے ادارے کو 300 ارب روپے کا نقصان ہوا۔

آڈیٹر جنرل کی رپورٹ میں بتایا گیا ہے کہ ادارے کی ملکیتی اراضی پر قبضوں سے 144 ارب 88 کروڑ روپے کا نقصان ہوا۔

اس کے علاوہ ایئرلائنز اور دیگر اداروں سے واجبات کی وصولی میں تاخیر یا عدم وصولی سے 14ارب 58 کروڑ کا نقصان پہنچا۔

آڈٹ اعتراضات میں 75 ارب 43 کروڑ غیر قانونی فلائٹس کی اجازت اور ان کے بقایاجات کی عدم وصولی کا ذکر کیا گیا ہے۔