دنیا بھر میں شہرت کی بلندیوں کو چھونے والے پاکستانی گلوکار عاطف اسلم نے فلسطینیوں کی مدد کیلئے خطیر رقم عطیہ کردی۔
اسرائیل کی جانب سے مظلوم فلسطینیوں پر مسلسل حملوں کا سلسلہ جاری ہے جس میں بچے اور خواتین سمیت شہید ہونے والوں کی تعداد 4 ہزار سے تجاوز کرچکی ہے، ایسے میں عاطف اسلم نے فلسطینیوں کی مدد کے لئے ڈیڑھ کروڑ روپے (15 ملین) عطیہ کردیئے ہیں۔
پاکستان سمیت مختلف ممالک کی جانب سے فلسطینیوں کی مدد کیلئے انسانی امداد بھیجی جا رہی ہیں ایسے میں عاطف اسلم نے بھی اپنا حق ادا کردیا۔
انسٹا اسٹوری شیئر کرتے ہوئے عاطف اسلم نے بتایا کہ غزہ سے سامنے آنے والی تصاویر بہت تکلیف دہ ہیں اور یہ ہم میں سے کسی کے ساتھ بھی ہوسکتا ہے۔
انہوں نے فلسطین کے مسلمانوں سے معافی مانگتے ہوئے کہا کہ ’میں معافی چاہتا ہوں میں وہاں نہیں ہوں اور جو تکلیف آپ محسوس کررہے ہیں وہ میں نہیں کرسکتا لیکن آپ سب میری دعاؤں میں شامل ہیں‘۔