پرامن اور مستحکم پاکستان کے لیے پرعزم ہیں، آرمی چیف جنرل قمر جاوید باجوہ

راولپنڈی: آئی ایس پی آر کا کہنا ہے کہ پاک فوج کے سربراہ جنرل قمر جاوید باجوہ نے یو این سیکرٹری جنرل انتونیو گوتریس سے ملاقات کی جس میں آرمی چیف کا کہنا تھا کہ پرامن اور مستحکم پاکستان کے لیے پرعزم ہیں۔

پاک فوج کے شعبہ تعلقات عامہ (آئی ایس پی آر) کے مطابق اقوام متحدہ کے سیکرٹری جنرل انتونیو گوتریس نے آرمی چیف جنرل قمر جاوید سے ملاقات کی جس میں افغان مفاہمتی عمل، افغان مہاجرین، مسئلہ کشمیر اور خطے کی سیکیورٹی صورتحال پرتبادلہ خیال کیا گیا۔

آئی ایس پی آر کے مطابق کے ملاقات کے دوران آرمی چیف جنرل قمر جاوید باجوہ نے کہاکہ ہم پرامن اور مستحکم پاکستان کے لیے پرعزم ہیں۔ اقوام متحدہ کی کشمیر سے متعلق قراردادوں پر عمل درآمد کی ضرورت ہے۔

یہ بھی پڑھیں: متنازعہ شہریت کا قانون پاکستان کے لیے پناہ گزینوں کے مسائل پیدا کرے گا۔عمران خان

آئی ایس پی آر نے کہا کہ سیکرٹری جنرل اقوام متحدہ نےسیکورٹی کی صورتحال بہتر ہونے اور خطے کے استحکام میں پاکستان کے کردار کو سراہا۔ انہوں نے پاکستان کی امن مشنز میں کردار اور دہشتگردی کے خلاف کامیابیوں کی تعریف کی اور یو این ملٹری مبصر گروپ کو کشمیرمیں رسائی دینے کا شکریہ ادا کیا۔

آئی ایس پی آر کے مطابق آرمی چیف جنرل قمر جاوید باجوہ کی امریکی نمائندہ خصوصی زلمے خلیل زاد سے بھی ملاقات کی۔

آرمی چیف اور زلمے خلیل زاد کے درمیان ہونے والی ملاقات کے دوران باہمی دلچسپی امور اور خطے کی سکیورٹی کی صورتحال پر بات چیت کی جبکہ افغان مفاہمتی عمل پر بھی تبادلہ خیال کیا گیا۔