گوگل نیوز پر ہمیں فالو کریںبارڈر پار محبت اور شادی صرف کرکٹرز تک محدود نہیں ہے، بلکہ انڈیا سے تعلق رکھنے والی ایک عام خاتون اپنی محبت پانے کے لیے لاہور پہنچ گئی ہیں۔ ندا نے شوہر فہد سے مقامی عدالت میں کورٹ میرج کرلی۔
لاہور کے باسی فہد کی محبت میں گرفتار انڈیا کے شہر بھوپال کی شہری ندا لاہور پہنچ گئی۔ ندا اور فہد کی سوشل میڈیا پر دوستی ہوئی جو بعد میں محبت میں بدل گئی۔
بھارتی خاتون نے محبت پانے کے لیے رخت سفر باندھا تو بارڈر کی رکاوٹ کو بھی عبور کر ڈالا۔ بعدازاں سیشن کورٹ لاہور میں ندا اور فہد نے کورٹ میرج کرلی۔
ندا کا کہنا ہے کہ میں ہمیشہ سے پاکستان آنا چاہتی تھی۔ اب پاکستان کی شہریت بھی حاصل کروں گی۔ انہوں نے کہا کہ مجھے انڈیا پاکستان میں کوئی فرق محسوس نہیں ہوا۔ دونوں ملکوں کے درمیان سرحدوں کے علاوہ سب ایک جیسا ہے۔
دونوں کی کورٹ میرج کروانے والے وکیل علی اکبر کا کہنا ہے کہ ندا پاکستان آ کربہت خوش ہے۔ اب خاتون کی خواہش کے مطابق سیٹیزن شپ ایکٹ کے مطابق پاکستانی شہریت دلانے کی کوشش کریں گے۔
ندا شوہر کے ساتھ ساتھ پاکستان کو بھی پوری طرح اپنا چکی ہیں اور خاندان میں ہونے والی تقریبات میں بھی حصہ لے رہی ہیں۔ دونوں میاں بیوی کو دیکھنے کے لیے مہمان بھی آ رہے ہیں اور ان کو مبارکباد کے پیغامات بھی موصول ہو رہے ہیں۔
