جامعہ کراچی خودکش دھماکہ کیس میں اہم پیشرفت، مبینہ ملزم گرفتار

جامعہ کراچی خودکش دھماکہ کیس میں اہم پیشرفت سامنے آئی ہے۔ سی ٹی ڈی نے کیس کے اہم مبینہ ملزم کو گرفتار کرکے تفتیش شروع کردی ہے۔

تفصیلات کے مطابق محکمۂ انسدادِ دہشت گردی (سی ٹی ڈی) نے ضلع شرقی میں کارروائی کرتے ہوئے جامعہ کراچی خودکش دھماکے کے ملزم کو گرفتار کیا جو خود بھی ایک دہشت گرد بتایا جاتا ہے۔

یہ بھی پڑھیں:

جامعہ کراچی میں خود کش بمبار کی فوٹیج سامنے آگئی

ملزم کے متعلق حکام کا کہنا ہے کہ تربیت یافتہ مبینہ دہشت گرد کو ضلع شرقی سے گرفتار کرنے کا مقصد جامعہ کراچی دھماکے کے ذمہ داروں کو کیفرِ کردار تک پہنچانا ہے۔

سی ٹی ڈی کا کہنا ہے کہ گرفتار ملزم خودکش دھماکوں کیلئے بم بنانے کا ماہر ہے۔ واضح رہے کہ جامعہ کراچی میں ایک خودکش بمبار خاتون نے دھماکہ کیا جس کے نتیجے میں چینی شہری اور ایک پاکستانی ڈرائیور جان کی بازی ہار گئے تھے۔ 

خیال رہے کہ اس سے قبل جامعہ کراچی میں کیے گئے دہشت گرد حملے اور دھماکے کی سی سی ٹی وی ویڈیو سامنے آ گئی، جامعہ کراچی کی فوٹیج میں ایک خود کش بمبار خاتون کو خود کو دھماکے سے اڑاتے ہوئے دیکھا جاسکتا ہے۔

 جامعہ کراچی میں خوفناک خودکش دھماکے کی سی سی ٹی وی فوٹیج اپریل کے دوران ایم ایم نیوز کو موصول ہوئی۔ کراچی یونیورسٹی میں خاتون خودکش بمبار نے چینی باشندوں کی گاڑی کو نشانہ بناتے ہوئے اپنی زندگی بھی برباد کر ڈالی۔

 پولیس کا کہنا تھا کہ خودکش دھماکے کے نتیجے میں 4 افراد ہلاک جبکہ 3 زخمی ہوئے۔ 2 چینی خواتین اور ایک مرد بھی ہلاک ہونے والوں میں شامل تھے۔ ایک دہشت گرد گروہ نے دھماکے کی ذمہ داری بھی قبول کر لی۔