معروف اداکار احسن خان چائلڈ پروٹیکشن بیورو کے خیر سگالی سفیر مقرر

لاہور: پاکستان کے نامور اداکار احسن خان کو چائلڈ پروٹیکشن بیورو کا خیر سگالی سفیر مقرر کردیا گیا۔

بچوں کے عالمی دن کی مناسبت سے چائلڈپروٹیکشن بیورو لاہورمیں مقامی این جی او کی معاونت سے تقریب کا اہتمام کیا گیا جس میں صوبائی وزیراطلاعات پنجاب میاں اسلم اقبال سمیت اداکاراحسن خان اور گلوکارعلی ظفرنےشرکت کی ۔

تقریب کے دوران اداکار احسن خان کو چائلڈ پروٹیکشن بیورو کا خیر سگالی سفیر مقرر کیا گیا،چائلڈ پروٹیکشن بیورو کی چیئرپرسن سارہ احمد نے بھی اس تقریب کی تصاویر سماجی رابطے کی ویب سائٹ ٹوئٹر پر شیئر کی۔

Ahsan Khan – Our brand ambassador for Child Protection & Welfare Bureau Punjab @Ahsankhanuk pic.twitter.com/LmV4ltejpy

— Sarah Ahmad (@SarahAhmad_PTI) November 20, 2019

اس حوالے سے اداکار کا کہنا تھا کہ ‘بچوں کے ساتھ ہونے والی بدسلوکی کو روکنا بےحد ضروری ہے اور حکومت کو بھی بچوں کی رہنمائی کے لیے اقدامات کرنے چاہیئے۔انہوں نے کہا کہ ہمیشہ ایسا لگا کہ بچوں کیلئے کوئی کام نہیں ہورہا،خواہش ہے کہ بچوں کیلئے بھی کوئی پروگرام منعقد ہوں ۔

تقریب میں موجود علی ظفر نے بھی بچوں کے تحفظ کے حوالے سے کہا کہ ہر کام کو کرنے کیلئے خود پر یقین ہونا بہت ضروری ہے، بچوں کے ساتھ بدسلوکی کے واقعات کو روکنا بھی وقت کی ضرورت ہے۔بچوں سے بات کرتے ہوئےان کا کہنا تھا کہ ‘والدین کے علاوہ کوئی شخص قریب آئے تو فوری شور مچانا چاہیے۔