مشیر خزانہ کو جتنی ٹماٹر کی قیمت معلوم ہے، اتنے ہی ان کے اعدادوشمار معتبر ہیں، احسن اقبال

لاہور: مسلم لیگ(ن) کے سیکرٹری جنرل احسن اقبال نے کہا ہے کہ مشیر خزانہ کو جتنی ٹماٹر کی قیمت معلوم ہے، اتنے ہی ان کے اعدادوشمار معتبر ہیں،الزام تراشیوں سے ملکی معیشت ٹھیک نہیں ہوا کرتی،بیڑہ غرق اور ستیاناس کا بیانیہ بول بول کر معیشت کا بیڑہ غرق اور ستیاناس کر دیا ہے۔

مسلم لیگ (ن)کے سیکریٹری جنرل احسن اقبال نے مشیر خزانہ ڈاکٹر عبدالحفیظ شیخ کے بیان پر ردعمل کااظہار کرتے ہوئے کہاکہ مشیر خزانہ ڈھٹائی سے جھوٹ بول رہے ہیں کہ اقتدار ملنے پر معیشت کی حالت خراب تھی۔

پوری دنیا، ورلڈ بینک اور عالمی ریٹنگ ایجنسیز نے تسلیم کیاتھا کہ پاکستان چھ فیصد ترقی کی شرح حاصل کرلے گا۔ نوازشریف کی قیادت میں مسلم لیگ ن نے 5.8 فیصد شرح سے ترقی کرتا پاکستان نالائقوں کے حوالے کیاتھا۔

احسن اقبال نے کہا کہ ہم نے 47 سال میں کم ترین تین فیصد مہنگائی کی شرح والا پاکستان حوالے کیا تھا، نالائق ٹولے نے اپنی نااہلی کی وجہ سے مہنگائی کی اس شرح کو 14 فیصد پر پہنچادیا ۔ایک سال میں آپ نے ملکی معیشت کا جنازہ نکال دیا، ترقی کی شرح آج اڑھائی فیصد پر ہے۔

ا نہوں نے کہاکہ ایشیا کی تیز ترین ابھرتی معیشت کو 15 ماہ میں جنوبی ایشیا کی سست ترین معیشت میں ڈھالنا پی ٹی آئی حکومت کا کارنامہ ہے۔کرنٹ اکاؤنٹ خسارہ آپ کی نالائقی کی ایک اور کہانی ہے، کاروبار اور معیشت ٹھپ کر کے تو یہ سرپلس ہی ہوگا۔

احسن اقبال کاکہناتھا کہ مسلم لیگ (ن)کے دور میں ریکارڈ ٹیکس وصولیاں ہوئیں، آپ کو162 ارب کے شارٹ فال کا سامنا ہے۔ آپ کی معاشی کارکردگی روزگار، کاروبار، دکان، فیکٹری زراعت اور صنعت کا بند ہونا ہے۔ آج لارج سکیل مینوفیکچرنگ، سمال انڈسٹریز، زراعت تمام بنیادی شعبے منفی جارہے ہیں۔

انہوں نے کہاکہ پہلی بار ہے کہ ا سٹیٹ بینک دیوالیہ ہورہا ہے، آپ کی نالائقی کا ثبوت یہ ہے کہ آج دفاعی بجٹ کے لئے مطلوبہ پیسہ نہ ہونے کے خطرات ہیں ۔تعلیم اور صحت کے فنڈز مسلم لیگ ن کے دور کے مقابلے میں کئی گنا گھٹا دئیے گئے،کیا 1,000 ارب روپے کے ترقیاتی بجٹ کو گھٹا کر 450ارب روپے کر دینا ترقی ہے۔