ویانا کنونشن کی خلاف ورزی پر وفاقی پولیس کیخلاف کارروائی کی جائے، کورین سفارتخانہ

اسلام آباد:شہر اقتدار میں واقع کورین سفارت خانے کے عملے نے وفاقی دارالحکومت اسلام آباد کی پولیس پر الزام لگایا ہے کہ وفاقی پولیس نے ویانا کنونشن کی خلاف ورزی کی ہے اور کورین سفارت خانے میں زبردستی داخل ہوئی۔

سفارتی عملے کا کہناہے کہ وفاقی پولیس 07مارچ کو ہمارے سفارت خانے میں سفارت خانے کے پچھلے گیٹ سے داخل ہوئی، پولیس ہمارے سفارتی عملے کو ہراساں کرتی رہی جبکہ وفاقی پولیس نے سفارت خانے کے اندرونی دونوں دروازوں کو بھی توڑ دیا تھا۔

سفارتی عملے کا اس حوالے سے مزید کہنا تھا کہ ہم نے احتجاجاً پاکستانی وزارتِ خارجہ کو معاملے سے آگاہ کرنے کیلئے باقاعدہ طور پر لیٹر لکھ دیا ہے۔

ہم آئی جی پولیس اسلام آباد سے مطالبہ کرتے ہیں کہ جن پولیس اہلکاروں نے زبردستی سفارت خانے میں ہمارے سفارتی عملے کو ہراساں کیا ہے ان کے خلاف فوری طور پر کاروائی کی جائے۔

مزید پڑھیں: یوکرین کا روس سے مذاکرات جاری رکھنے کا فیصلہ، اہم روسی مطالبات منظور

اسلام آباد پولیس نے ہمارے سفارت خانے میں زبردستی گھس کر ویانا کنونشن کی کھلم کھلا خلاف ورزی کی،جس کی ہم بھرپور مزمت کرتے ہیں اور حکومت پاکستان سے مطالبہ کرتے ہیں کہ آئندہ ایسے واقعات کی روک تھام کی جائے اور وفاقی پولیس کے اہلکاروں کے خلاف کاروائی کی جائے۔