آگے بڑھنے کیلئے شارٹ کٹ کو ذہن سے نکالنا ہوگا، رمیز راجہ

لاہور:پاکستان کرکٹ ٹیم کے چیئر مین رمیز راجہ کا کہنا ہے کہ آگے بڑھنے کیلئے شارٹ کٹ کو ذہن سے نکالنا ہوگا، سخت محنت سے خود کو منوانے کی ضرورت ہے۔

رمیز راجا نے گزشتہ روز مقامی ہوٹل میں نوجوان کرکٹرز سے ملاقات کی اور انکے سوالات کے جواب دیئے، ملاقات میں ٹیموں کے کوچز اور سپورٹ اسٹاف کو مدعو نہیں کیا گیا تھا۔

رمیز راجہ نے نوجوان کرکٹرز کو کھیل میں جدت لانے، فیلڈنگ اور فٹنس بہتر بنانے کی ہدایت کے ساتھ انٹرنیشنل معیار کی سہولیات فراہم کرنے اور مزید پیسہ خرچ کرنے کا عندیہ دے دیا۔

چیئرمین پی سی بی نے کہا کہ میں یہاں چیئرمین پی سی بی نہیں، بطور کرکٹرز ملاقات کے لیے آیا ہوں، آگے بڑھنے کے لیے شارٹ کٹ کو ذہن سے نکال دیں، سخت محنت سے خود کو منوائیں۔

مزیدپڑھیں: بھارت کو ہرا کر میگا ایونٹ کا آغاز کریں گے، حسن علی

انہوں نے کہا کہ پرفارمرز کو ضرور موقع ملے گا، کوچنگ کے معیار کو بھی بہتر بنانا ہے، اس میں غیر ملکی کوچز بھی لائیں گے، پاکستان کرکٹ کی بہتری میں سب کو کردار ادا کرنا پڑے گا،میرے دروازے سب کے لیے کھلے ہیں۔کسی کے ساتھ نا انصافی نہیں ہوگی۔